حسام حبيب يهنئ تامر حسني ورامي صبري بأغنيتهما الجديدة “فعلاً مابيتنسيش”
كتبت: هدير عبد الوهاب
هنأ الفنان حسام حبيب، عبر حسابه الرسمي على “إنستجرام”، الفنانين تامر حسني ورامي صبري على أغنيتهما الجديدة “فعلاً مابيتنسيش” التي حققت انتشاراً واسعاً فور طرحها منذ أيام قليلة.
وعبر “حبيب” عن فخره بانتمائه لهذا الجيل. حيث كتب في رسالته: “أنا بكتب كلمتين من قلبي مش عارف هي مباركة ولا شكر ولا درس ولا بداية جديدة لجيل أنا فخور إني أكون منه. أخواتي وأصحابي”.
وأضاف حسام حبيب: “تامر، أنت من زمان وأحلامك وأفكارك كانت دايمًا تخص جيلك ودايمًا كنت بتتكلم معانا من وإحنا صغيرين باسم جيلنا، مش باسم تامر بس. أنت حلمت لجيلك وعلشان كده أنا فعلًا فهمت يعني إيه نجم الجيل. كنت زمان فاهم إن المقصود بيها إنك الأنجح وده حقيقي، لكن النهارده فهمت معناها الحقيقي. أنت النجم إللي حلم لجيله مش لنفسه، ودلوقتي حلمك بيتحقق يا صاحبي”.
وعن رامي صبري قال: “والنجم الثاني، أخويا صاحب أجمد صوت وإحساس، كان دايمًا بيقول لي أنا بحلم وعندي هدف، وهو كمان كان دايمًا مهتم إن إحنا كجيل لازم نشارك بعض ونقدم للناس حقيقة روح وفن الجيل ده. وكان بكل تواضع بيقول ده لكل فنانين جيله، لحد ما التقوا النجمين اللي هدفهم صادق وطلعوا لنا إبداع مش بس في المزيكا، لا والله، في الروح والفكر”.
كما اختتم رسالته معبراً عن سعادته, قائلاً: “أنتم فرحتوني وأمتعتوني وخليتوني أفتخر إني من الجيل ده إللي إن شاء الله عمره فنه وإبداعه ما هيخلص. شكرًا إنكم فتحتم نفسي وخلتوني أحب المزيكا يمكن أكتر من الأول. يا جيل جامد، وجامد قوي كمان. أنتم اللي فعلًا متتنسوش”.
إقرأ أيضاً: إيلون ماسك يضع إدارة ترامب في بؤرة الهجوم
ومن جانبه، رد الفنان تامر حسني برسالة دعم وتحفيز قوية، وكتب عبر حسابه الرسمي: “حبيبي يا حسام، إيه الكلام الجميل ده؟ طول عمرك محترم وإنسان نضيف وفنان كبير. لو استفزناك بجد، يلا ارجع زي الأول وأكتر. ارجع متعنا بأغانيك الراقية الجميلة، لأن ليك جمهور كبير بيستني شغلك، وأكيد ليهم حق عليك. يلا يا حس، صفحة جديدة مع مشوارك من النهاردة. يلا أوعدني قدام الناس إنك ترجع تاني”.
