ملحن “الغزالة رايقة”: اللحن مش مقتبس
إسراء البواردي
نفى الفنان إيهاب عبد الواحد ملحن وموزع أغنية “الغزالة رايقة” اتهامات سرقة اللحن من أغنية روسية
وقال عبد الواحد خلال مداخلة هاتفية له في برنامج “حديث القاهرة” المذاع على شاشة القاهرة والناس الكلام دة مش صحيح، كنا قاعدين مع الشاعرة ولحنت الأغنية وفعلا تابعت الكلام اللي بيتقل وسمعت الجزء الصغير اللي بيتشابه من بعيد مع الأغنية الروسية.
وتابع قائلًا تاريخي يشهد عليا لا أنا بتاع الحاجات دي ودة طبيعي جدا أنه يحصل لا هو سرقة ولا اقتباس وبقول للناس هو احنا بندور على الحاجات الوحشة ونمسك فيها.
وأضاف :والله مش أنا اللي اكتشفت محمد اسامة، وانا بقيت الحاجتين دول هما اللي بجاوب عليهم دلوقتي اني مسرقتش اللحن ومكتشفتش محمد اسامة.
وعن محمد أسامة قال :صوته في مرحلة البلوغ وهيجي كمان سنة لازم يتمنع من الغنا علشان صوته ينضج ويتحول من الصوت الطفولي للنضوج.
ومن جانب آخر كشفت الشاعرة منة عدلي القيعي المزيد عن كواليس أغنية “الغزالة رايقة”، الأغنية الدعائية لفيلم “من أجل زيكو”، التي حققت نجاحا كبيرا منذ طرحها قبل أيام، وانتشرت عبر مواقع التواصل الاجتماعي.
وفي مداخلة هاتفية مع الإعلامي يوسف الحسيني ببرنامج “التاسعة” المذاع عبر القناة الأولى المصرية، تحدثت منة القيعي عن الطفل محمد أسامة الذي شارك في أداء الأغنية قائلة: محمد أسامة صوت رهيب وكلنا لما سمعناه مكانش في اختلاف عليه، متمكن وبيحفظ في ثانية وبيقول الحاجات صح..
وأضافت: في البداية بيتر ميمي كلمني عن فيلم بيحضر له مع كريم ومنة وكل الناس الرهيبة، وبيتر لوحده فرصة بالنسبالي، وكل الأسامي اللي في الفيلم، وكان حابب يكون في أكتر من أغنية في الفيلم، وبناء عليه تواصلنا مع الملحن إيهاب عبد الواحد ملحن أغاني الفيلم، وبدأنا نشتغل على كل أغنية حسب توظيفها الدرامي. الغزالة رايقة مش أول أغنية نشتغل عليها، بس الأغنية الأهم ولما الناس هتتفرج على الفيلم هتفهم ليه.
وتابعت: قعدنا ندور على جملة كاتشي تنفع تتغنى، ومصطلح الغزالة رايقة في دماغي من فترة ومش عارفة أعمل بيه إيه. وفي جزء من الأغنية كان موجود في أغنية رومانسية جدا عملتها مع إيهاب عبد الواحد، حاجة تغنيها شيرين عبد الوهاب، لكن كانت بلحن مختلف، فاقترحت عليها نغيرها ونضيفها في مكانها في الفيلم.
وأكملت: أنا لما ألاقي الأطفال سامعين حاجة ومبسوطين بحس إن الأغنية نجحت، هو ده المعيار بالنسبالي مش المشاهدات.
يذكر أن فيلم “من أجل زيكو” من بطولة كريم محمود عبد العزيز، منة شلبي وغيرهم نخبة من النجوم ومن إخراج بيتر ميمي.
