محمد حراز يكتب الأشاير والبشاير .. الفصل الخامس مركز البوليس

المأمور: في خبر غير سار يارشدي يافندي
اليوزباشي رشدي: خير يا حضرة المأمور؟!

المأمور: النهاردة في المديرية السيد الحكمدار بلغني انهم تلقوا معلومات عن دخول كميات كبيرة من المخدرات تم تصبيرها على عوامات في عرض البحر، وناويين يدخلوها خلال أيام..

اليوزباشي رشدي: ودي نفس المعلومات اللي وصلتني يافندم وهي سبب وجودى الآن..

المأمور: معنى كده انهم في المديرية سابقينا بخطوة، ودا يخليني أقولك، اننا لازم نقبض على المجرمين قبل المديرية ماتوصلهم، وقبل مايغرقوا البلد بالمخدرات..

اليوزباشي رشدي: إن شاء الله هايحصل ياحضرة المأمور
المأمور: تقديم المسيرة الأربع (تيام) دول بيؤكد شكوكنا

اليوزباشي رشدي: أكيد يافندم..

المأمور: إذاً لو ربطنا بين معلومات المديرية، والمعلومات اللي وصلت لنا، وبين تقديم المسيرة ليوم الخميس، نقدر نستنتج اللي بتفكر فيه يارشدي..
اليوزباشي رشدي: كده حضرتك متفق معايا
المأمور: طبعاً .. وأقدر أقولك كمان ان اللعبة خلاص .. انتهت

اليوزباشي رشدي: بالعكس يافندم، دي كده ابتدت، واحلوت قوي، وها نشوف وجوه جديدة مكناش نتصور أنها بتدير المسرح في الخفاء، وها نعرف مين اللي كان بيسرب أخبارنا طول المدة اللي فاتت..
المأمور: يبقى نشرب القهوة، وبعدين نجهز الخطة البديلة، ونأجل الخطة اللي اتفقنا عليها في وجود رجال المكافحة..

اليوزباشي رشدي: حضرتك بتقرا أفكاري..
ابتسم العقيد رفعت الجيزاوي، ثم قام بالضغط على جرس مكتبه..
شاويش مغاوري: أفندم

المأمور: قهوتي مظبوط، وشوف قهوة رشدي بيه..
اليوزباشي رشدي: على الريحة يامغاوري
الشاويش مغاوري: حاضر ياسعت البيه

المأمور: بسرعة يا شاويش، وخُد الباب وراك..
الشاويش مغاوري: حاضر ياسعت البيه

اليوزباشي رشدي بعد انصراف مغاوري: تأمين المسيرة هايتم زي ما هما متعودين في كل مرة .. وها نتحرك بعد انتهاء المسيرة بساعة كاملة، تكون المراكب دخلت على السقالة، وطوايل السمك مليانة، ثم يغمز بعينه..

الشاويش مغاوري يدخل بالقهوة….

اليوزباشي رشدي في حدة: تقريرك في دورة المكافحة في السويس ممتاز يا مغاوري
الشاويش مغاوري: توجيهات سيادتك يافندم
المأمور: انت خامة كويسة ياشاويش مغاوري
الشاويش مغاوري: متشكر يافندم

اليوزباشي رشدي: حضر نفسك يامغاوري هاتطلع معانا مأمورية تأمين المسيرة

الشاويش مغاوري: تمام يافندم

منزل نرجس
فتحية الخاطبة تطرق باب شقة نرجس: ياولاد ياللي هنا..

أم نرجس: حاضر ياللي ع الباب

تقوم أم نرجس بفتح الباب لتجد فتحية الخاطبة التي تطلق “زغروتة” طويلة قبل أن تدخل، فتستقبلها أم نرجس بترحاب وحفاوة، ثم تقول: يا أهلا وسهلا بوش الفرح، خطوة عزيزة ياست فتحية .. اتفضلي .. اتفضلي ارتاحي هنا يا جلابة الخير.

فتحية الخاطبة: اللهم صلى على النبي .. أمال فين عروستنا؟!

أم نرجس: عروستنا..!! موجودة ياوش الخير .. بتبل الشربات علشان زفة الخليفة، مدد يا أهل المدد..
فتحية الخاطبة: بشرة خير ياختي وهانشرب شرباتها هي كمان بالصلاةُ على النبى

أم نرجس: اللهم صلي عليك يانبى .. تسلملنا ياست فتحية، آهو علشان اطمن عليها قبل ماموت

فتحية: بعد الشر عليكي ياحبيبتي .. انتِ هاتشيلي ولادها وولاد ولادها إن شاء الله

ام نرجس تنادي عليها: نرجس .. يانرجس
نرجس: أيوَّة يامه

أم نرجس: تعالي سلمي على الست فتحية.
فتحية: تعالي .. تعالي ياحبيبتي.. اقعدي جنبي .. أيوة جنبي هنا

اقتربت نرجس من فتحية الخاطبة، وعلى وجهها ظهرت علامات الفرح وهي تحاول اخفائها: ازيك ياست فتحية

فتحية الخاطبة: بسم الله ماشاء الله .. صلاة النبى أحسن، يا أرض احرسي ماعليكي، شربات الخليفة بشرة خير، وانا جايَّلكم بالخير كله..

أم نرجس: دخلتك دخلت خير يا وش الخير
فتحية الخاطبة: عريس ملو هدومهُ، طول بعرض ومقتدر، هيبة وعيلة وجيوب مليانة، هاينغنغك في العز، وها يصيَّغك من ساسك لراسك، وهاينيَّمك على الحرير، وهايستتك ياست البنات، بس حلاوتي محفوظة

أم نرجس: حلاوتك … ثم تضع يدها على صدرها؛ دي عندي أنا

نرجس: يطلع مين العريس اللُقطة ده ياست فتحية؟!
فتحية: والنبي قبل ما يفاتحني ويقول اسمك، أنا قلت له عروستك عندي

أم نرجس: مين النبي حارسه ده ياست فتحية؟
فتحية الخاطبة: الريس حمدون

أم نرجس وقد أصابتها الصدمة: حمدون !! ؛ دا متجوز يا ست فتحية

نرجس بينها وبين نفسها: بركاتك يام توحتح
فتحية الخاطبة: ومالهُ .. لا عيب ولا حرام، الشرع محلل أربعة طالما مقتدر وصحتهُ كويسة.

نرجس: حمدون!!!

فتحية الخاطبة: إيه رأييييك؟؟

أم نرجس: رأيها في إيه ياست فتحية، ناخد الراجل من على مراته، الله يسامحها بقى…..
نرجس: أنا موافقة .. بس بشرط

صباح الخميس يقوم عثمان المشعلجي بإصلاح وضبط الفوانيس وتزويدها بالزيت، فينتقل من فانوس لآخر كعادته اليومية، ولكن الإهتمام اليوم يبدو أكبر من كل يوم استعدادا لزفة الخليفة بعد صلاة المغرب، وكذلك المعلم نعمة العِرسة صاحب صوان العِرسة للفراشة، يشرف بنفسه على تعليق البيارق والأعلام في السوق، بداية من ضريح أبو عتمان نقطة خروج الأشاير وحتى مكان فرقة الإنشاد نهاية المسيرة..

المعلم عباس سردينة: الله ينور يارجالة .. ربنا يكرمك ياريس حمدون مفيش مسيرة، غير وانت متكفل بكل مصاريفها.

المعلم نعمة العِرسة: الحقيقة يامعلم عباس، الأستاذ حليم الجواهرجي شيخ الصاغة هو اللي متكفل بكل المصاريف، علشان يوفي ندر عليه، بعد ما ربنا كرمه ومراته جابت نسيم

المعلم عبده القهوجي: يامعلم عباس .. الأستاذ حليم والمعلم حمدون دول كُبار البلد، مالنا إحنا ومالهم، احنا نتفرج من بعيد لبعيد، ونعمل اللي ربنا يقدرنا عليه..

الشاويش مغاوري: مساء الخير ياحليم افندي

حليم: حمدالله بالسلامه يا مغاوري، إيه الغيبة الطويلة دي؟!

الشاويش مغاوري: يادوب خلصت المأمورية في السويس ولسه راجع..

حليم: وإيه الأخبار؟!
الشاويش مغاوري: بلغ حمدون الجو عَدَلْ …