فضفضة بنات على فيس بوك:« عندنا أمهات قاسيات ولديهن حب التملك ومش عاوزينا نتجوز»

فضفضة بنات على فيس بوك:« عندنا أمهات قاسيات ولديهن حب التملك ومش عاوزينا نتجوز»

تحولت مجموعات أو جروبات موقع التواصل الاجتماعي« فيس بوك»، إلى مكان لـ« فضفضة» البنات وإخراج أسرار بيوتهن والشكوى من معاملة امهاتهن، على غير العادات والتقاليد التي تربين عليها.

حيث حكت فتاة تحمل اسم« أم رحمة»، عن حالتها على إحدى الجروبات حيث قالت،« أنا غير كل الناس، وأمي غير كل الأمهات، أنا اتجوزت وكنت فاكرة أن امي هتقف جنبي وتحافظ عليا وعلى بيتي، لكن كانت السبب في خراب بيتي وتركي لزوجي، بسبب حب الامتلاك والعند والقسوة، كانت بتعامل جوزي دايما بتعالي وقسوة وتحرضني عليه، وبعد 5 سنين من الجواز كان مصيري الطلاق ولما رجعتلها ببنتي قالتلي ارميهاله او مش هتقعدي معايا».

وانهالت عليها التعليقات التي طالبتها بضرورة البحث عن شغل لتستطيع الإنفاق على ابنتها وان تعيش وحدها بعيداً عن منزل امها.

لم تكن تلك الفتاة هي الوحيدة التي شكت مما وصفته بـ« قسوة أم»، بل حكت أخرى قائلة « من غير اسم.. انا للاسف مشكلتى ان امى قسايه جدا وعندها حب امتلاك لينا اول ما كبرنا وبدأنا نتخطب ونتجوز ظهرت شخصيتها الحقيقه كأنها مرآه اب للاسف كانت بطفش العرسان ومش عاوزه تجاوزنا غير ان معاملتها لينا بتتغير اهانه وضرب وسمعنا ألفاظ بشعه مع اننا احنا واخواتى الحمد لله كل الناس تخلف باخلاقنا»، هكذا كان جزء من رسالة فتاة ارسلتها على إحدى الجروبات او الصفحات الكبيرة والتي يتخطى متابعيها لأكثر من 600 ألف متابع .

الأم تلغي موعد زفاف ابنتها

واستكملت الفتاة،«إرادة ربنا فوق كل شئ واتجوزنا كلنا الحمد لله بس انا مش قادرة أنسى ان امى لغيت ميعاد فرحى ومحضرتش ومخلتنيش اخرج من بيت ابويه يوم جوازى وخرجت كانى عامله عاملة غير انها أيام خطوبتى كانت بتشتمنى وتطعن فى شرفى وتجرحنى بكلامها وضربها ليه ، مش عارفه اتعامل معها ولا قادرة أنسى بحلم بكوابيس بيها، أودها ازاى واروح ازورها ولا لا».

وانهالت التعليقات عليها ، ما بين فتيات يرفضن نبرة الرسالة التي تهين الأم على حد وصفهن، حيث قالت رنا محمد، « هقولك حاجه مامتك لسه صغيره وبتهتم بجمالها وكدا، بس انتوا كبرتوا اخدوا عنها الأنظار، اصبحت تغير منكم. وبحكم سلطتها كأم بقت تعمل كدا
مع الوقت هتصدق أن كل واحد ليه أيامه وأنها كبرت وراحت عليها، انتي انسي. وروحي وزوريها، بس خلي جوزك يقلها كلام حلو يعني ايه الحلاوة دي، انتي بتصغري يوم عن يوم وكدا، تقريبا مفيش تحليل غير كدا، اوعي تقاطعيها هي طيبه. بس مش مصدقه انها كبرت وخلاص راحت عليها».