سيد رجب يحكي حدوتة لنجوم صنعوا مسيرة فنية حافلة رغم رحيلهم

كتبت أسماء حسني

لأن الفن يعيش عمر أكبر من عمرنا ، ظهر الفنان سيد رجب على مسرح مهرجان الجونة مرتدي بدلة رسمية باللون الأسود ونسف أسفلها قميصاً باللون الأبيض وربطة عنق باللون الأسود.

وتحدث عن نجوم فارقوا عن عالمنا أبرزهم سمير غانم، دلال عبد العزيز ونور الشريف وقال ( كان ياما كان مين فينا مسمعش الكلمتين دول ويتحكيلوا حدوتة زي دي حدوتة قبل النوم ونغمض عنينا ونسرح في الحدوتة كأننا شايفنها بالظبط).

وأكمل سيد رجب حديثه قائلاً (بس اللي كان بيحكي الحدوتة كان بيبذل مجهود آه كان بيغير صوته عشان يقلد الشخصيات، كان يطفي النور ونسرح مع الحدوتة بخيالنا ونتأثر بالشخصيات كأنهم ناس نعرفهم بجد،وأتفرجنا على الحواديت في السينما، الحدوتة بقا ليها صوت وصورة حقيقية، بس مبقناش نشوفها عشان نعرف ننام بقينا نشوفها عشان نعرف نعيش،أوقات كتير بنحس اننا مش لوحدنا، فا بنشوف شخصية ونقول ياه، يعني مش أنا لوحدي الـ بفكر كدا).

وتابع قائلاً (في مننا الـ لقى قصة حب بتحصل في فيلم وفيه الـ يعرف أزاي يحب من الفيلم، أتعلقنا بالـ بيمثلو الفيلم زي متعلقنا بالحواديت).

وتم عرض بعض من لقطات فيلم زيزو لسمير غانم ، ولقطات بين دلال عبد العزيز وسمير غانم، ثم تابع سيد رجب وقال (ياخي ده أنت لو قاعد ومش طايق نفسك وأفتكرتلهم أفيه مزاجك كله بيتغير وممكن تشغل فيلم أو مسرحية شفتها قبل كدة 100 مرة لاكن بردو قادرة تضحك من قلبك ومع الوقت مبقناش نحس إنهم بعيد عننا بالعكس ده أوقات كتير بيفكرونا بنفسنا بيفكرونا بأهلنا )

وعرض مشهد لدلال عبد العزيز من فيلم حزلئوم وتابع سيد وقال( الناس دي مبتبطلش تعمل أفلام حلوة واحنا مبطلناش نحبها ونتعلق بيها علشان كدة مهما راحوا مهما غابوا عن عالمنا ده عمرهم ماهيسبونا، لأنهم ببساطه بقوا جزء مننا جزء من فكرنا جزء من تكوينا جزء من أحلامنا هو ده جمال السينما وأبطالنا اللي عاشوا معانا قدام وورا الكاميرا هيفضلوا عايشين معانا ، يابختهم وتوتة توتة لسه مكملة الحدوتة ).