رنا سماحة تعود لزوجها من جديد
داليا أشرف
نشرت المطربة رنا سماحة فيديو لها عبر حسابها الشخصي على إنستجرام مع زوجها الملحن سامر أبو طالب خلال حفل إكتشافهما نوع المولود، لتعلن بذلك إنهاء الخلافات الزوجية بينهما والتي تصدرت الحديث على مواقع التواصل الإجتماعي في بدايات الشهر الجاري.
يذكر أن الثنائي سامر أبو طالب ورنا سماحة حذفا جميع صورهما معاً وألغى كل منهما متابعته الأخر وردت الفنانة رنا سماحة سابقاً على كل هذه الأخبار المنتشرة عن إنفصالها عن زوجها الملحن سامر أبو طالب.
وكتبت رنا سماحة عبر حساباتها عبر مواقع التواصل الإجتماعي (عذراً أيها ال trend، فلدي ما هو أغلى من كنوز العالم، أتعلمت في بيت أهلي، أن العلاقة بين الراجل والست أمانه مينفعش تطلع بره البيت، خطيبتك مراتك طليقتك أياً كان، الأمانة دي ولاد الأصول بس الي بيعرفوا يصونوها وميفشوش أسرارها).
وأستكملت رنا قائله (ولاد الأصول بس الي مبيكذبوش ولا بيتدعو على بعض بالباطل ولاد الأصول بس الي مبيخونوش الأمانة، ولاد الأصول بس مبيفجروش في الخصام، ولاد الأصول مش محتاجين يستعطفو حد ولا محتاجين يتدعو المثالية بيسيبوا أخلاقهم تتكلم عنهم ومبيتكلمهوش هم عنها، ولاد الأصول مبيلقحوش على بعض مبيجيبوش سيرة بعض غير بالخير، ولاد الأصول بيعاشروا بالمعروف وبيفارقوا بالإحسان، ومبينسوش الفضل بينهم).
وتابعت (ده الي ربنا أمرنا بيه ده الي أهالينا ربونا عليه ده الي الإنسانية بتقوله، أي حاجه غير كده تبقى عدم تربية، قلة أدب، إنعدام أخلاق، إنعدام الأخلاق ده مينفعش نزينه ونقول اوووه ترند، في داهية الترند اللي ينسينا أخلاقنا وتربيتنا وأصولنا الإنسان بيعيش حياته وبيمشي رحله، مش هيفضل منها سيرتك وأعمالك الطيبة وكلمتك اللي بتتصدق بيها سيبوا الخير وأنتو ماشيين عشان الناس تدعيلكم بدل ما يدعوا عليكم اجعل من يراك يدعو لمن رباك).
وأختتمت رنا سماحة كلامها موضحة (بطلب من أي حد هيكلمني عشان يعرف أي تفاصيل تخص حياتي الخاصة يوفر على نفسه وميكلمنيش ميهمنيش السبق الصحفي ولا الشغل الإعلامي ولا الأكثر بحثاً غير في شغل فقط، في الخير والفرحة وبس، عاهدت نفسي وأهلي والناس اللي بحبهم أني أكون خير قدوة عاهدت أبني اللي عيني لسه مشافتوش أني أربيه على الأصول والإحترام والرقي عاهدته إني أربيه يبقى ف متستنوش مني ما يفعله الآخرون، مش عايزه أبقى ترند).
وأرفقت رنا مع الفيديو رسالة من زوجها سامر أبو طالب حيث قال فيها (أولاً الحمد لله ثانياً هقول لك كلمتين الجايين دول لـ أم ملك مراتي حبيبتي وأم أبني اللي أكتشفت الفترة اللي فاتت أني ماقدرش أعيش من غيرها ولا حتى بكون مبسوط في أي حاجه حتى أبسط الأشياء هى لازم تكون فيها معي بحبها أوي بجد يمكن كنت أوقات بعند بس أكتشفت أني فعلاً ما ينفعش أكون غير ليها وهى مينفعش تكون غير ليا).
وأعتذر سامر أبو طالب لزوجته قائلاً (أسف لو زعلتك في أي حاجه وربنا يباركلي فيكي ويحفظنا من كل شر ويبعدنا عن الحسد والحقد واللي كارهين يشوفونا مرتاحين وهاديين، والحمد لله دائما وأبداً نيجي بقى لـ برنس قلبي أبني وقرة عيني حبيبي وصاحبي وأخويا اللي لسه ماشفتوش مالك، مش هقولك غير إني بحبك ولما تيجي بالسلامة هقول لك حاجات كثير قوي نفسي أقولها لك مش هتفارق حضني أبداً بحبك يا رنا بحبك يا مالك شكراً الناس اللي كانو بيكتبولي كلمة حلوة عشان عاوزين يشوفونا تاني مع بعض).
وردت رنا على كلام زوجها وقالت (الحمد لله يا حبيبي ربنا يخلينا لبعض يارب ويخليك ليا ولمالك يارب ويبعد عننا أي حاجه وحشة عيشنا فترة صعبة والحمد لله أنها عدت، مفيش بنا آسف يا أبو مالك بس عارف لو عملت كده تاني ربنا ميحرمناش من بعض ويحفظ بيتنا ويكبر ويعمر وجودك وسطينا يارب امين بحبك يا جوزي).
من ناحيه أخرى أحييت المطربة رنا سماحة حفلاً غنائياً ضخم في يوم 7 سبتمبر الماضي، وذلك على خشبة مسرح قاعه النهر بساقية عبد المنعم الصاوي بمنطقة الزمالك، ومن المقرر أن ينطلق الحفل في تمام الساعه الثامنة مساءً.
