خالد أبو بكر يكتب : زوروا مسلسل عمر أفندي تجدوا مايسركم

إنترو

من زمن والمبدعين إشتغلوا على الزمن .. السفر عبر السنين شغل خيالهم والنوستالجيا دفعتهم لقطع تذكرة سفر للماضي .. ومن أشهر الأعمال إللي ناقشت السفر عبر الزمن

Back to the future

ل روبرت زيميكس .. آلة زمن بترجع ب مارتي من 1985 الي 1955.. وشوفنا في 2010سمير وشهير وبهير بيرجعوا بالزمن في آلة برضه بس تأليف وبطولة أحمد فهمي شيكو هشام ماجد واخراج معتز التوني.

Midnight in Paris

ل وودي ألن .. العودة للزمن هنا مش بآلات لكن عربية تجرها الخيول تعدي الساعة 12 تصحب البطل في رحلة للعشرينات .. الفيلم فاز باوسكار افضل سيناريو أصلي .

Groundhog day

ل هارولد رامس .. عن توقف الزمن ويوم بيتعاد كل يوم .. ودا اللي اتاخد منه فيلم الف مبروك بطولة أحمد حلمي تأليف آل دياب إخراج أحمد نادر جلال .

أما المسلسلات خد عندك : 

Dark .. Travelers.. Continuum.. DC’s Legends Of Tomorrow..Quantum Leap.. Monkeys … وعمر افندي .

بطاقتو

تأليف مصطفى حمدي إخراج عبد الرحمن أبو غزالة (أول أعماله)

بطولة أحمد حاتم (علي|عمر) .. رانيا يوسف (دلال) .. آية سماحة (زينات) .. مصطفى أبو سريع (دياسطي) محمد رضوان (شلهوب) .. محمود حافظ (أباظة) .. ميران عبد الوارث (ماجي) .. محمد عبد العظيم (لمعي اللامع) .. أحمد سلطان (صبري) .

رأي مشاهد على السوشيال:

فعلًا مسلسل أكتر من رائع جميل أوووى لا دا حاجه 17زى ما بيقول دياسطى أنا بحس أنى نفسي الاقى ممر زيهم وأروح للناس دى وأقصى معاهم بعض الوقت أنا طول عمري بحلم بكده فعلًا لحد ما الحلم أتلون وبقى اسمه عمر أفندي.

ايه إللي عجبك في عمر أفندي 

الهروب من الواقع .. أيوه انت نفسك تهرب من واقع مر وحياة ملتهبة لزمن أسهل أجمل يعني حاجة 13 خالص بالمناسبة حكاية 13 دي إن إللي كان بيشتري دستة جاتوة 12 قطعة كانوا بيحطوله القطعة ال 13 هدية علي الحاجة الحلوة .

الوسيم الشيك صعب يضحّك ودا كان تحدي أحمد حاتم مع شخصية عمر .. وهو حاول يكون لايت ويتماشى مع السياق ومدخلش سباق مين يضحك أكتر وإللي ساعده على دا توفر كوميديا الموقف ومع إنه مش من مواليد منطقة الكوميديا لكن قدر يمثل بإسلوب السهل الممتنع .

مصلحة لأحمد حاتم إن الملحد إتأجل لو كان نزل مع غضب مسبق من الجمهور كان هيحصل رد فعل إنتقامي يأثر سلبيًا على إستقبالهم لعمر افندي .. خليك (عاشق) أحسن يا فنان .

دياسطي : إحتهد في دوره وأهتم بآبعاد الشخصية وركز في تفاصيل الزمان والمكان وخصائص شخصيته وإتخلي عن المذهب (البيومي) في الكوميديا (كل الشخصيات شخصية واحده لا تتغير شبه الممثل نفسه) علي فكره شخصية دياسطي هي إمتداد لشخصية شكري سرحان في فيلم البوسطجي لما كان بيفتح الجوابات.

رأي مشاهد على السوشيال :

– دور دياسطي من أجمل أدوار المسلسل وأكثر شخصية بتحسسك بالأربعينات .

– شلهوب : الشرير الظريف ورغم أن علامة الصلاة باينه على جبين محمد رضوان لكن عديناها وصدقنا إنه يهودي وعشان بنكره اليهود المؤلف طلع شلهوب بخيل وكداب ونصاب وحرامي وجاسوس وجبان وعاجز .. واتعمد يخلي المومس بتاعته اسمها راشيل عشان الجمهور مايزعلش .

لمعي اللامع : الشهير بالنجس إللي أجاد في أدائها محمد عبد العظيم رغم صغر مساحة الدور ورغم إنها شخصية أكلاشية (شخصية متكرره في الأعمال الفنية زي شخصية الواد النتفليكس إللي في بيت الدعارة دي بتتكرر من أيام عادل إمام في فيلم سيد درويش ) إنما هنا كانت الشخصية ظريفة وتحسه مخلص قوي ومتحمس ومتفاني في شغلته مع إن المهنة دي حاجة 69 خالص .

إنما رانيا يوسف كانت باهته وبتأدي من غير نفس يمكن تركيزها في الغنا نساها التمثيل بعد رائعتها (ليك) 

مش هنتكلم على محمود حافظ عشان هو بيدفع ضرايب وأحنا قاعدين تحت التكييف .

آيه سماحة مستواها بيتطور من عمل للتاني وعملت شخصية بسيطة لذيذة بدون أفورة .

رأي مشاهد من السوشيال :

• احلى حاجه أداء آيه سماحه و دياسطي وعمر واوحش حاجه تمثيل رانيا يوسف ومراته الاتنين دول جم غلط.

الكتابة سلسة ومسلية وعجبت الناس وفيها تطور ملحوظ من السيناريست بعد فيلم (نعمة 2016) وقدر بذكاء يشتغل علي تأثير النوستالجيا في نفوس المشاهدين و يصحح مفهوم الزمن القديم عند الجيل الجديد .

رأي مشاهد من السوشيال :

أنا كنت فاكر إن الحياة زمان وحشة لا نت ولا كهرباء ولا أي حاجة من إللي موجودة حاليًا بس لما شوفت المسلسل غير لي نظرتي ١٨٠ درجة حسيت إن نفسي أعيش عيشة جميلة وراقية زي دي وقد أيه ده كان زمن بسيط وهادئ بتلاقي فيه وقت لنفسك وأهلك .

الإخراج بسيط وجميل ومحسناش بإستعراض عضلات للمخرج ولا كان بيفكرنا بنفسة كل شوت .. لما المشاهد ميحسش بوجود المخرج يبقى نجح .

كل عناصر العمل من ديكور وملابس وإكسسوار وإضاءة وتصوير ومونتاج كانت متناغمة ومنسجمة ومناسبة للتعبير عن زمنين يفصل مابينهم 80 سنة .

مشكلتي كانت مع الموسيقى .. خليط غريب مش مفهوم ولا معبر بلعكس كان مزعج وفصيل .

هفواتو

الدور التاني خارجي بنسيون دلال فيه يفط لشركات ومكاتب كده البنسيون دور واحد ؟ طب إزاي وعندنا شوت لغرفة 207 إللي خاف منها عمر وعندنا جملة لزينات بتقول اوضة 260 كل دا في دور واحد ؟!!.

الشجرة الواتساب تنفع زينات تكتب عليها عشان عمر بيختفي لما يروح زمنه إنما لما يرجع لسنة 43بيكتب على الشجرة ليه مايروح لزينات علي طول.

دياسطي شاف فرح في بيت حبيته إعتبرها إتجوزت وراح ماشي ورتب كل أفعاله وتصرفاته على كده مع انه كان لازم يسأل دا فرح مين لأنه طلع بعد كده فرح أختها .

فجأة لقينا مرات عمر او علي موجوده سنة 43 يعني دخلت البيت عادي واكتشفت السرداب عادي طب لما هو سهل كده محدش إكتشف السرداب من زمن أبوه طول السنين دي ؟والأغرب رد فعل مراته هي مش فارق معها انها سافرت في الزمن لا عادي كأنها سافرت الساحل هي فارق معاها إن جوزها واقف في الشارع مع واحده تانية .

في آخر المسلسل دلال قالت لعمر أبوك تهامي بيقولك (المرتبة إللي مكنتش بتريحك وانت صغير هتريحك وانت كبير) فراح لقي الفلوس اللي سدد بيها ديون دلال وزينات والبنسيون وانتهت المهمة وإتحلت المشكلة .. لو كانت قالتله كده من ساعة ماعرفت انه إبن تهامي مكنش هيبقى في مسلسل .

القفلة غريبة بصراحة والناس كانوا عايزين البطل يعيش بين زمنين زي أبوه .. رجوع سنة لورا معناها تمهيد للجزء التاني

رغم الهفوات لكن الأكيد إن المسلسل عجب الجمهور وحبوه واستمتعوا بيه وعاوزين جزء تاني من سلسلة فروع عمر افندي .