خالد أبو بكر يكتب : خدوا عيني شوفوا بيها .. من كتاب إحمي نفسك من الزومبي

شوفت في الصورة إللي فوق واحد بيبص في نظارة معظمة ؟ ولّا شوفت عربية ؟ لاحظت حرف (A)؟!

ليست الأشياء كما تبدو .. لكن كما نحب أن نراها

نفس الحاجة حد يشوفها حلوة والتاني يشوفها وحشة .. نفس السلوك حد يشوفه تمام قوي وحد يشوفه عيب قوي .. نفس الشخص حد يشوفه بني آدم كويس وحد يشوفه مش بني آدم اصلًا .. كل واحد بيقيم ويحكم من وجهة نظره.

نظرتك لأي شئ بيحكمها ميولك ورغباتك ومعتقداتك وعاداتك ونوعك وبيئتك وثقافتك ومحددات تانية بتصبغ الأشياء بألوان معينة وتمنحها معانى مختلفة عن الآخرين .

البحر بالنسبة لبنت حبيبها غرق هو مقبرة سائلة تدعو للحزن وتسبب الكآبة

البحر بالنسبة لبحار لقى فيه كنز غيّر حياته هو نعمة وثروة ونعيم

البحر بالنسبة لواحد بيصيف عادي هو تسلية وتغيير جو لانعمة ولا نقمة

كل شخص بيشوف الموجودات سواء كانت أشياء او أشخاص زي ماهو عايز يشوفها مش زي ماهي موجوده بالفعل لأن البحر في حقيقته ولا حاجه من التلاته السابقين هو تجمع كبير للمياه المالحة يتصل بالمحيط …..

وردة في قاعة افراح الزمرده تعبّر عن الفرحة

نفس الوردة في قرافة الغفير تعبّر عن الحزن

أرنب ولّا بطة ؟

بصوت يسرا : ياختي كدا ينفع وكدا ينفع .

= في آواخر القرن التاسع عشر زار الروائي الفرنسي (فلوبير) الأهرامات ولما شاف أبو الهول قال : جمّدنا بنظرته المفزعة .. لقد شعرت بالدوار .

وفي سنة 1943 تشرشل وروزفلت جم مصر ولما شافوا ابوالهول تشرشل قال : لم تقل لنا شيئا .. إحتفظت بإبتسامتها الغامضة .

يعني لا إتفزع ولا حاجه دا كمان أعتبر أبو الهول واحده ست ؟!!

الإختلافات مش بس من شخص لآخر .. نظرتك انت للأمور بتختلف من وقت للتاني في حياتك .. أكيد اتفرجت على فيلم وانت صغير واتأثرت بيه وبكيت وانت بتشوف نهايته ولما كبرت ضحكت على سذاجة السيناريو والتمثيل والإخراج والفوم إللي بيتكسر في أفلام الأستاذ يوسف منصور .

الوقت مثلًا مش بيمر علي كل الناس بنفس الطريقة .. شكسبير بيقول : الوقت يمر بطيئًا على السجين سريعًا على العاشق .

الخمس دقايق إللي بيعدو عليك في غفوة منبة الموبايل الساعة سبعة الصبح بيعدو خمس ثواني .. الخمس دقايق إللي بيعدو عليك وانت مزنوق والحمام مشغول بيعدو خمس ساعات .

شايف نجوم السما ولا وجه بنت ؟ .. طب خدت بالك من السمكتين إللي في الصورة ؟

شوفت ايه في الاول وايه بعد كده ؟ .. دا بيأثر ازاى على اختيارتنا وقرارتنا وحكمنا على الأمور ؟

واحد : هتنتخب مين للبرلمان ؟

واحد تاني : أشرف محمد .. وانت ؟

واحد : هنتخب محمد أشرف

واحد تاني : بس دا علماني

واحد : والتاني سلفي

واحد تاني : السلفي متدين

واحد : السلفي متشدد

واحد تاني : العلماني منحل

واحد : العلماني متفتح

واحد تاني : السلفي بيلبس جلابية بيضا

واحد : العلماني بيلبس كل الألوان

واحد تاني : الأبيض دليل النقاء

واحد : الألوان دليل التنوع

واحد تاني : الألوان مثيرة للريبة

واحد : الأبيض بيتوسخ بسرعة

واحد تاني : إحضرنا يا اخ .. انت بتأيد الأبيض ولا الألوان

واحد تالت : البدنجان

واحد : شكلك مقاطع

واحد تالت : بس انت متقاطعش

واحد تاني : أشرف محمد هو رجل المرحلة

واحد تالت : صح جدًا

واحد : محمد أشرف هو مرحلة الرجل

واحد تالت : جدًا صح

واحد تاني : نحب نتعرف بحضرتك

واحد تالت : أشرف محمد أشرف

انت شايف كل حاجه من زاويتك وكل واحد شايفها من زاويته ودا اللي مخلينا مختلفين في الإنتخابات والكورة والأذواق والتفضيلات والمعايير والتقييمات وكل حاجه من أول كمية السكر في الشاي لغاية نشأة الكون وعبادة رب الكون .

الفكرة دي هتوصلنا إن كل واحد من اللي حواليك شايفك بطريقة غير الآخرين فماتحولش ترضي الناس لأن كل واحد فيهم عاوزك بشكل .. مديرك عاوزك تموّت نفسك في الشغل وخطيبتك عاوزاك تموت فيها هي (هو الشغل أهم مني ) .. لو حاولت ترضي طرف هيزعل باقي الاطراف وهتلف في دايرة مفرغة

• آمال أرضي مين ؟

= ربنا .. يغيّر ولا يتغيّر .. أقرب ليك من حبل الوريد .. لو تقربت ليه ذراع تقرّب ليك باع .. مش هيحكم عليك بالظاهر زي الناس لأنه يعلم مافي الصدور .

إرضي ربك ترضي نفسك تنعم بالسكينة توصل للنفس المطمئنة .

(نكمّل الحلقة الجاية)