خالد أبو بكر يكتب : حمّال الأسيّة – من كتاب إحمي نفسك من الزومبي 

شيل (الهمّ التقيل) هيكسر ضهرك

*الهموم هي التفكير السلبي في المشاكل اللي بتضغط علي النفس وبتحاصرها والخوف من المخاطر اللي ممكن تحصل مستقبلا فتسبب شعور بالتوتر والقلق وفقد البهجة وضيق الصدر .

شيّال هموم : ايه كل الكراتين والاكياس دي ..انا هشيل كل دا ؟!!

آمر ناهي : وبدون مناقشه .. ابدأ بكرتونه التفكير في المستقبل .. دي مليانه خوف وقلق وفيها كيس مجهول مش هتعرف جواه ايه مهما عملت

شيّال هموم : انا مش قادر على النهارده .. هشيل همّ بكره كمان

آمر ناهي : شيل على ضهرك وانت ساكت .. وشيل شوال ارتفاع الاسعار وانخفاض الدخل دا علي صدرك

شيّال هموم : دا تقيل قوي .. وكل شويه بيتقل اكتر

آمر ناهي : هيتقل لحد مايفطسك .. شيل .. وارفع الكيس الاسود بسرعة

شيّال هموم : دا كئيب قوي .. شكله مليان مشاكل

آمر ناهي : مشاكل متراكمه ملهاش حل اترصت فوق بعضها وهنحط عليها مشاكل جديده اتقل منها

شيّال هموم : يا حوستي السودا .. وباقي الكراتين دي تطلع ايه ؟

آمر ناهي : تشكيله فاخرة من هموم البيت والبلد والعالم والكون

شيّال هموم : هشيل كل دا لوحدي ؟!!

آمر ناهي : شيل كويس واوعي حاجه تقع منك .. وشيلني معاك .. مانا همّك التقيل برضه

الهم بيعمل إيه في الشيّال ؟

الجهاز العصبي : أرق – كوابيس – إكتئاب

الجهاز المناعي : ضعف الجهاز والإصابة بالأمراض

الجهاز الهضمي : قرحة المعدة وإضطرابات قولون

الجهاز التنفسي : ربو وتشنجات الشعب الهوائية

مشاكل جلدية : حساسية وحبوب

أمراض القلب : ضغط الدم وتصلب شرايين

متشيلش همّ 

بعد طقم الأمراض اللي فوق دا .. إوعى إياك آبداّ نهائي تشيل همّ .. محدش قالك تجاهل المشاكل و إهرب منها او إنكر وجودها بالعكس لازم تواجه وتحل لكن .. متشيلش همّ .. المشاكل حواليك في كل مكان مش دي المشكلة الأزمة تبدأ لو المشاكل دخلتلك وفضلت جواك .. السفينه مش بتغرق من الميه اللي حواليها .. بتغرق لما الميه تدخلها .

إزاي أنزّل الهمّ من على ضهري ؟

• حدد وقت للتفكير في المشاكل ومناقشتها مع أطرافها والمشاركين فيها او من يهمهم الأمر غير الأوقات دي اطرد الأفكار السلبية من دماغك .. متسمحش للمشاعر الكئيبة تهاجمك في اي وقت وخصوصا قبل ما تنام .

• فضفض مع الناس الثقة إحكي همومك وأطردها بره نفسك واوعي تكبتها .. عبّر عن غضبك ولو عاوز تعيط عيط مش عيب .. الستات بيعيطوا اكتر من الرجاله عشان كده متوسط أعمارهم أكبر .

• إشغل نفسك بحاجه مفيدة و ممتعة الفراغ ثقب كبير بتتسلل منه الأفكار السلبية والذكريات المؤلمة وتفضل تعيد وتزيد في الكلام المقلق والمحزن مانت فاضي بقى .. لأ احنا مليانين قوي وسدينا الثقب وعقلنا مش فاضي للكلام الفاضي .

• الرضا بالواقع هيخفف عليك هموم الواقع .. الدنيا كدا والناس كدا .. العالم المثالي اللي بتحلم بيه مش موجود على الأرض .. الدنيا والناس والزمن مش أدوات في إيدك هتشكلهم وتستخدمهم علي مزاجك .. دي قوانين كونية لحكمة ربنا سبحانه وتعالى .. عيش حياتك ببساطة ودوّر علي أسباب السعادة الشخصية .. غيّر اللي ممكن تغييره و المستحيل إقبله علي وضعه .

• الرياضة والإسترخاء هيساعدوك تكون أقوى في مواجهة المشاكل والهموم والضغوط هما مش عناصر اساسية لكن عناصر مساعده .. لما تمارس تمارين رياضية بتخرّج طاقة غضب مكبوته زي مابتخرج العرق من مسام جلدك الرياضة بتحسّن المزاج وتشحن الطاقة وتظبط الدورة الدموية وتخليك تاكل كويس وتنام كويس ومعاها تمارين إسترخاء كده ورحرحه.

• التسامح والعفو مع نفسك ومع الآخرين بيطفي نار الغضب والحقد والكره والإنتقام وكلها أفكار ومشاعر سلبية لو إتخلصت منها هتتخلص من جزء كبير من همّك التقيل .. سامح نفسك وإغفرلها الهفوات والأخطاء البسيطة وبص لقدام .. لما تسامح الاخرين – اللي مش قاصدين يضايقوك طبعا – بتفيد نفسك لأنك بتنهي عداوات ومشاكل مش عايزه تخلص .. انت تاخد قرار حاسم إنها تخلص وتنساها وتفكر في حاجة تسعدك .

• حل المشاكل أول بأول قبل ماتكبر وتبقي أزمة ملهاش حل .. كل حاجه في أولها بتكون صغيرة – حتى احنا – ومع الوقت بتكبر .. متكبّرهاش ومتخليش المشاكل تضم على بعض ويتحدّوا عليك وساعتها تقف عاجز قدامها.. إقضي عليها وهي صغيرة وخلّص نفسك من مشاكلك

• إكتب .. آه إكتب .. الكتابة علاج .. مش هتكتب عشان تكون مؤلف ولا هتنشر كتاب .. إكتب ترتاح اكتب تتخلص من أفكارك السلبية الزومبية .. إمسك ورقة وقلم وادلق الأفكار اللي بتطاردك والهواجس والمخاوف إرميهم على الورق وبعدها إرمي الورق قطعه إحرقه قبل ماهمّك يحرقك .. إكتب ذكرياتك القديمة المؤلمة اللي بتجري وراك إقفشها وإحبسها في الورق وإتخلص منها للأبد …

…..ومتشلش همّ

(نكمّل الحلقة الجاية)