خالد أبو بكر يكتب: حبّها من قلبك .. من كتاب إحمي نفسك من الزومبي

 نفسك : انت مش واثق فيّا يا حبيبي ؟

انت : مانتي ليكي حركات كده مش تمام

نفسك : قولي بصراحه .. انت مبقتش تحبني ؟

انت : مش حكاية حب ..

نفسك : الحب حكاية العمر كله

انت : بحبك .. خلاص ؟

نفسك : مش من قلبك .. على فكره أنا سمعتك بتقول لشريف صاحبك.. أنا كرهت نفسي

انت : دا كلام كده .. كنت مخنوق

نفسك : الكلام دا بيأثر فيا قوي

انت : يعني انتي عايزاني أقعد أقول أنا بحب نفسي أنا مبسوط بنفسي أنا فخور بنفسي

نفسك : متقول يا عم ايه المشكله .. كلام حلو وبيفرحني .. مش أحسن ماطول اليوم تقول أنا زهقت من نفسي أنا طهقت من نفسي أنا كرهت نفسي .. خلي بالك أنا قاعده جواك وبسمع كل دا وبتقهر .. انت مش بتراعي مشاعري خالص

انت : طيب خلاص متزعليش .. أنا بحب نفسي

نفسك : دلعني

انت : نعم ؟!!

نفسك : قوم سرح شعرك إللي شبه غابات السافانا .. أغسل وشك يمكن ينضف من التكشيره إللي لازقه في ملامحه .. البس حاجه فاتحه عشان ربنا يفتحها في وشك .. انزل غيّر جو في مكان جديد بدل القرافه إللي مسميها أوضه .. قابل ناس جديده غير شريف وسامح إللي معندهمش غير العيشه سودا الحياة كئيبه مفيش فايده لحد ماخلوك تفكر إزاي تقتلني وتموت كافر

انت : عندك حق أنا هكلم شريف وسامح وننزل آ…..

نفسك : مفيش فايده .. دي عيشه سودا

تقدير الذات

اعمل لنفسك شهادة تقدير إكتب فيها : 

تقدير لدور نفسي الإيجابي وثقة في ذاتي

وقدراتي ومهاراتي

نفسك هتستلم الشهادة ودموع الفرح في عنيها

فلاش باك .. قبل ثلاث شهور

كنت بتبالغ في الإعتذار – بتبالغ في مدح الاخرين – بتوافق علي اي حاجه – بتكبّر عيوبك الصغيرة – بتتجاهل مشاعرك – بتسمح للآخرين بتقرير مصيرك – بتتمسك بالعلاقات السامة – بتنتقد ذاتك دايمًا– بتقارن نفسك بالآخرين – بتشكك في إمكانياتك – بتقبل الهزيمة بسهولة – مهمل في مظهرك – بتتعلق بالماضي ورافض الحاضر وخايف من المستقبل ..

يانهار ابيض كل دا !!

إلحق نفسك

• الإعتذار يكون علي الأخطاء الحقيقية المؤثرة مش عمّال علي بطّال مش كل ماحد يلومك علي حاجة ممكن تكون معملتهاش تقوم تعتذر وهو يلومك تاني وأنت تعتذر تالت ومش هنخلص دا حتي الأعتذار يفقد تأثيره .

• مدح الاخرين في حدود .. المبالغة في المدح تدخّلك أرض النفاق ويشك (ممدوح) – إللي انت بتمدحه يعني – إنك عايز منه حاجه ومع الوقت مش هيتبسط من المدح لأنه كتر ورطرط .. إمدح الشخص المناسب في الوقت المناسب ولأنه عمل حاجه فعلا تستحق المدح .

• متقولش ماشي علي كل حاجة .. إللي يناسبك وافق عليه وإللي مش مناسب أرفضه .. لأ موجوده بس إنت مش بتستعملها .. متعملش حاجه مش عايزها عشان ترضي حد علي حساب نفسك .. قول لأ ووضح أسبابك للي حواليك وهما هيقدروك – اذا كانوا بيحبوك -اما لو بيستغلوك فكويس انك قولت لأ ومن غير توضيح وإقطع علاقتك بيهم .

• بطل تكبّر عيوبك وتحطها تحت ميكروسكوب .. قول لنفسك مفيش إنسان خالي من العيوب إحنا مش ملايكه ودا ميمنعش من كشف العيوب وتعديلها والتخلص منها ولو مقدرناش يبقي نتعايش مع بعض العيوب الصغيره ومتطلبش من حد يقولك عيوبك عشان هيقولك الحاجات إللي شايفها عيوب من وجهه نظره هو .. هيقيسك علي قده .. عشان عايزك تبقي شبهه .. وانت مش ممكن تكون هو .. خالص .

• إظهر مشاعرك الحقيقية للناس .. متكونش زعلان وحزين وعشان تجامل حد تمثل إنك فرحان .. متشلش في نفسك وتسكت .. متشفش حاجه مش عجباك وتقول ياسلام حلوه قوي .. متسمعش كلمه تجرحك وتكتم في نفسك وبعدين تروّح تقفل باب اوضتك وتضلمها وتقعد تكرر الكلمة وتتعذب .. طاقة الغضب من الإهانة

والتجريح لو مخرجتش في إللي كان السبب هتحرقك من جواك .. واجه الموقف بشجاعة ودافع عن نفسك بقوة وخلص الموضوع في وقته ومكانه وأوعي تروح تنام وانت شايل في نفسك أبداّ .

• إسمه مصيرك مش مصيره ولا مصيرهم الكلمة آخرها (كاف) يبقي انت إللي تاخد قرارك كاف برضه .. إستشارة الآخرين والإستفادة من خبرتهم مش معناه إنك تتنازل عن حقك في تقرير مصيرك .. إللي بيختارلك شايف الموضوع من ناحيته وبيطبق تفضيلاته حسب تكوين شخصيته وبيعتقد انه اختارلك الصح لكن مين إللي حدد الصح والغلط ؟ .. مين قرر إن الإختيار دا أفضل من غيره ؟ .. مين ممكن يحس بيك أكتر من نفسك ؟.. قرارك في إيدك من أبسط الأشياء تاكل ايه تشرب ايه تلبس ايه لغاية تدرس ايه تتجوز مين تشتغل ايه .. وحكاية هعمل زي الناس دي في الحمام بس .. إنما في حاجه تانيه مفكرتش فيها .. ماتخلي الناس تعمل زيك .. ايوه ..لو شافوك عملت حاجه ونجحت هما يقلدوك ..

إستشير وإتعلم وإدرس وإبحث وخد رأي الناس في اي قرار مصيري بس في الأخر .. إعمل اللي نفسك فيه .

• إقطع العلاقة السامة وإهرب .. لما تتصدم في شخص كنت فاكره حبيب وطلع عدو يبقى ………….

 {نكمّل الحلقة الجاية}