إقطع العلاقة السامة وإهرب ..
لما تتصدم في شخص كنت فاكره حبيب وطلع عدو يبقى….. في إحتمال من إتنين .. هو عدو أصلاّ من زمان وقدر يخدعك بالكلام وشوية حركات خلتك تقول عليه إنسان كويس او كان حبيب وإتحول مع الوقت وبقى حد تاني عكس اللي كنت تعرفه يعني إتحول لزومبي .
العلاقه السامة زي الدوا بتاع أحمد القاطن في دير النحاس
لاتشرب هذا الدواء .. فيه سم قاتل
- الدوا احنا اللي طلبناه والعلاقة احنا اللي عملناها بس مكنّاش نعرف إن فيها سم حتى لما جت تحذيرات من ناس خايفة علينا وشايفة السم سم مش دوا مصدقناش ودافعنا عن السم وطلعناهم غلطانين !!
هتصدق لما أعراض السم تظهر عليك وتلاقي نفسيتك بتخرب حتة حتة وحياتك بتسّود نقطة نقطة وتحس انك وقعت في فخ مسكك من رقبتك و كل ماتحاول تحرر نفسك بتتخنق أكتر .
- مهما كانت التضحيات المطلوبة عشان تقطع العلاقة القاتلة ضحي وإنت الكسبان .. وجودك فيها هيقضي عليك تماماّ وهروبك منها هو النجاة .
إزاي تعرف إنك في فخ إنسان سام
- لما يلبي إحتياجاته علي حساب إحتياجاتك .. اللي هو عايزه يتعمل واللي انت عايزه مش مهم .
-
لما يدخل السام في نوبات غضب غير مبرره وبعدها يبرر غضبه بأسباب تافهه .
-
لما يتسلط عليك ويأمر وينهي في كل كبيرة وصغيرة ويتدخل في أدق التفاصيل ويحددلك الصح والغلط ويختار ويقرر وانت قاعد منزوع الإرادة تتفرج علي حياتك بتنهار .
-
لما يحمّلك مسؤلية كل شئ .. اي مشكلة انت السبب فيها اي أزمة انت مصدرها ولولا وجوده كانت هتحصل كارثة .
-
لما يحسسك إن كل اللي حواليك بيضروك وهو الوحيد اللي بينفعك وانك دايماّ محتاجله ومتقدرش تكمل حياتك من غيره في الوقت اللي هو بيستغلك وبيستخدمك لتحقيق أغراضه الشخصية .
أعراض التسمم
الإكتئاب : شعور عام بالحزن بيطوّل وفقدان للرغبة والإهتمام والشعور بالإحباط .
التوتر : الشعور بالصداع الدائم وألم في الصدر وفقدان للشهية وإضطراب في النوم .
مع إن اللي فات كفايه عشان يهد حياتك لكن كمان هيحصل إضطراب في الطعام يعني شويه تاكل بشراهه والوزن يزيد وبدانة وأحيانا إمتناع عن الأكل ونحافة وهزال .. دا جسمانياّ .
نفسياّ .. هتفقد الثقة في نفسك ومش هتبقي عارف ايه الصح من الغلط .. وتفقد علاقاتك الإجتماعية واحد ورا التاني لحد ما تبقي وحيد معزول مكتئب وهو دا اللي عايزه الزومبي السام .
ألترياق ( مضاد السم )
- إقطع العلاقه فورا وبدون تردد .. إقطع يعني إقطع .. إستعيد حياتك اللي إتسرقت منك .. إوعي تتردد او تقول يمكن يبقي كويس او يرجع زي زمان او تقول لازم أقف جمبه واساعده .. غلط .. السام مش في محنه عشان تقف جمبه دا أناني وعاوز يبني نفسه ويهدك .. بيحولك لسلم يطلع عليه ومش مشكله إن يدوس عليك .. إنت بالنسباله لعبة بيتسلي بيها وبعدين هيكسرها ويرميها ويدور علي لعبة غيرها .. يبقي لازم تقطع العلاقة وتتخلص من السم والهدايا اللي جبهالك عشان دي جزء من الفخ وتنسي الكلام اللي قالهولك لأنه كله كدب وخداع .. إعمل بلوكات في كل وسائل الإتصال .. هيشتري أرقام جديده بلوك برضه حتي لو اشتري محل إتصالات .. متسمحش للوسطاء اللي هيضحك عليهم ويفهمهم إن إنتو زعلانين شويه وهتتصالحوا .. وضح باختصار إنك مش زعلان بالعكس انت بتخف منه بتتخلص من آثار السموم اللي دخلت نفسك وروحك .. في المرحلة دي هيحاول يثبت للآخرين إن هو اللي مش عايزك وانك بتحاول تتواصل معاه وهو رافض ودا عشان يحافظ علي كبريائة المزيف .. متشغلش نفسك وكمّل حياتك .. الخلافات والمشاكل هي المية العكرة اللي الزومبي بيصطاد فيها .. جفف المنابع وسيبه يدبل لحد مايزهق ويدوّر علي ضحية غيرك يعضها .. لا تردد .. لا تراجع .. لا إستسلام .
المساحه الفاضية في حياتك إملاها بأشخاص جدد إيجابيين وإشغل نفسك بمهام جديدة وأعمال منتجة .. اللي أجلته طول فترة إختطافك إعمله دلوقت وبدون تأجيل .. شوف ايه اللي يبسطك وكنت متنازل عنه وإستمتع بيه لأنه أبسط حقوقك .. إرجع تواصل مع الناس وعبّر عن مشاعرك وفضفض مع الحبايب ومش عيب تطلب منهم المساعده .. إرجع خطط لمستقبلك وحياتك .. إرجع أحضن نفسك وطبطب عليها .
(نكمّل الحلقة الجاية)
