خالد أبو بكر يكتب : انت مين في دول ولاّ انت كل دول (ج2) – من كتاب إحمي نفسك من الزومبي

الحساس

الشخصية الحساسة بتتأثر بشدة بالمحفزات الخارجية وخصوصًا الإجتماعية زي أصوات الأخرين وتعبيرات وجوههم.

عنده حساسية مفرطة في جهازه العصبي ودا بيأدي لإستجابة مبالغ فيها تجاه الأصوات والروائح والمشاهد وإللي بيعدي علي الناس ميعديش عليه يعني صوت ضعيف محدش مركز فيه عند الحساس واضح وعالي ومزعج رغي كتير في وسطه كلمه عابره يقف عندها ويركز فيها ويحللها ويربطها بالمكان والزمان وحالة اللي قالها وميوله وأهدافه وقصة كبيره ساعتك.

ورغم المعاناه إللي بيكون فيها الحساس خصوصًا لو عايش في وسط مزعج إلا إن الحساسية لها فوايد برضه الحساس عنده مهارات إجتماعية وبيتعلم بسرعة ومبدع ومبتكر وقادر يكوّن علاقات سريعة ناجحة وغالبًا الحساس فنان ولو مطلّعش الإحساس الزايد في أعماله هيضر نفسه ويتعب إللي حواليه.

نشاط الجهاز العصبي الزائد بيخليهم عرضة للعصبية والإنفعال في كل لحظة وأفضل الحلول للشخصية الحساسة انه يبعد قدر المكان عن مسببات العصبية ويقضي وقته مع إللي فاهم حالته وبيعرف يتعامل معاه ويطلّع افكاره ومشاعره وآراءه في شغله بشكل مفيد ومنتج.

المتحفظ

كتوم لا يظهر مشاعره للآخرين .. يبان جامد وقوي وتقيل ويقولوا عليه مغرور لكن الحقيقة هو متحفظ بس ودا بيخليه متوتر من جواه وقلقان معظم الوقت وعنده صداع أو قرحه معده أو قولون عصبي.

دقيق في عمله ومتفاني ويحب النظام .. صريح مع الناس وبيشاور علي عيوبهم مباشرة ودا بيجيبله مشاكل.

متحفظ : انتي لابسه باروكه يا حماتي ؟

حماته : انت خدت بالك ؟

متحفظ : أي حد ياخد باله شكلها وحش قوي

حماته : انت بتحدف طوب من بوقك

متحفظ : انتي كبرتي على الحاجات دي أمال بنتك تعمل ايه ؟

حماته : بنتي هتتجوز ابن خالتها .. إمشي اطلع بره

الجـذاب

إيجابي واثق في نفسه عارف قدراته مهتم بمظهره ساحر المجتمعات يخطف الأضواء ويشد إنتباه الجميع قيادي ومصدر ثقة الأخرين.

مرح ينشر السعادة في كل مكان يتواجد فيه لأن الإنسان بطبعة يميل للمرح والضحك والبهجة والشخصية الجذابة تقدر تحضر وجبة السعادة.

صادق لأن الكذب والخبث واللف والدوران صفات منفرة للبشر والناس بتدور علي الصادق صاحب الكلمة الواحده إللي بيوفي بوعوده عشان يتلموا حواليه ويمشوا وراه.

متفهم بيسمع الناس ويقدر ظروفهم ويراعي مشاعرهم ويهتم بتفاصيلهم ودا بيخليهم دايمًا محتاجينه ومهتمين يسمعوا رأيه أو حتى يفضفضوا معاه.

متواضع مهما كبر شأنه يفضل متواضع لأن الغرور صفة طارده للبشر والشخص الجذاب بيعامل الناس ببساطة بدون تكلف وميتكلمش عن نفسه غير لو حد سأله.

شيك الجذاب بيلبس كويس بيهتم بشكله لأن الإنطباعات الأولى تدوم بيظهر دايمًا بشكل جميل ولما الناس تعرفه تلاقيه أجمل.

ظهور أعراض الزومبي (هجوم خارجي )

الشخصيات اللطيفة الطيبة المسالمة الجذابة أزاي تتحول لزومبي ؟!!

لو زومبي عضك هيعديك ومن غير ماتحس .. تتحول لزومبي

مديرك المتسلط عضك قصدي أهانك قدام زمايلك ترجع البيت تهين مراتك قدام الولاد وتطلّع الراجل إللي خاف يطلع قدام المدير.

صاحبك الخاين بيتكلم عنك وحش في ضهرك تتكلم وحش عن كل أصحابك وكوكتيل غيبة ونميمة وميمنعش نألّف عليهم مواقف محصلتش.

تاجر مستغل زود عليك كام جنية تقوم تزود على كل خلق الله بدعوى الناس كلها بتعمل كده.

فرند فيس مستفز كتبلك تعليق سخيف وخبطك أغضبني فأغضبك فعلا تمسك فرنداتك واحد واحد وبوست بوست وهاتك ياتعليقات مستفزة بدون داعي.

هتكدب هكدب هتسرق هسرق هتحرق هحرق ………….

سم الزومبي بيسري في عقلك ويسيطر علي نفسك ومن غير ماتشعر بقيت زيهم .. زي إللي كنت بتكرههم وتلعنهم

الوقاية خير من العض

لما تتعرض للعض من زومبي متسلط خاين جشع مستغل كداب مستفز إفتكر انه كان انسان طبيعي زيك وساب نفسه للزمبقة لحد مابقى زومبي .. انت لأ .. متسبش نفسك للأفكار الشيطانية من نوعية إشمعنى انا.. زي ما بيعملوا هعمل .. ماكلهم كده .. هو انا اللي هعدل الكون .. اه انت واحد من اللي هيعدلوا الكون .. ربنا خلقك تعمّر وتبني وتتعلم وتبتكر ومع كل دول تعبده وتسبّح بحمده .. يعني انت بتعامل ربنا مش الزومبي وهتتحاسب علي أفعالك لوحدك ومش هينفع يوم الحساب تقول أصل كلهم كده.

لما دبانه تضايقك هشها .. لسه موجوده ؟ رشها .. هات مضرب ودمّرها .. الدبان كتير ؟ ..إمشي من المكان الموبوء دا .. حلول كتير مش من ضمنهم إنك تتحول لدبانة

أعراض الزومبي (هجوم داخلي)

ودا الأخطر حضرتك .. يجيلك هاجس من جواك يقولك :

ليه الدنيا معنداني .. ليه أنا منحوس كده .. كل مادخل في مشروع يفشل .. كل ماعرف حد يطلع نيله خالص

ليه اتولدت في البلد دي .. ليه أنا اتولدت في العيلة دي .. ليه أنا اتولدت اساسًا ……

ليه زميلي ناجح وأنا لأ .. ليه صاحبي إتجوز واحده حلوه وأنا لأ .. ليه إبن خالتي جاب عربية وأنا لأ .. ليه محسن بيكسب فلوس وأنا لأ ….. وتفضل محسور بين ليه وأنا لأ لمّا تتفعص

الوقاية : ربنا خلق كل واحد (واحد صحيح) ورزقه من فضله .. إنما توزيعة الرزق مختلفة من واحد لواحد .. الرزق : مال وأولاد وصحة وعلم ومحبة الناس .. شوف عندك ايه وارضى وإعلم إن إللي شايفة من اللآخرين قشور حياتهم وإن عندهم نواقص زيك ويمكن أكتر .. النعيم في الجنة مش في الدنيا.

متقارنش نفسك بحد ..أطرد الافكار السلبية وإتبسط باللي عندك .. أنتصر على جيش الزومبي .

(نكمّل الحلقة الجاية}