خالد أبو بكر يكتب : الغالب غالب والمشاهد مغلوب
وأنا بقلب في المنصات لابيّا ولاعليّا إتخبط في حاجة إسمها الغالب غالب , مفهمتش دا ايه ولا مين الواثقه المترفعه إللي محتله البوستر لحد ما انقذتني المدام من جهلي وعرفتني انها بتصمم مايوهات بوركيني .
طموحي قاتل
جملة بتكررها (المصممة) على استفززازنا بفساتينها ومجوهراتها وعربياتها وفيلاتها وشاليهاتها وبابا …. سايبها براحتها خالص و(المايند اوبن) على البحري خالص خالص ولو حاول يتخطي حدوده ويمثل دور الاب بنته تبرقله وتشوحله وهي بتفكره انه شغال عندها وهي إللي بتجيب الفلوس فيتلم ويلزم حدوده.
نجمة واحدة وكومبارسات كتييير
ملكة الخلية عندها شغيلة في كل خطوة .. إللي عاملين اصحابها زيهم زي علب البرشام واحد مسكن للملكة لما تتضايق .. التاني مضاد حيوي لما تحتقن .. التالت مرهم لما تورم , أم وأب وخدامين وخطيب سابق وحاقدين وحاسدين وموحوحين لكن على مين أنا برّاوية ومحدش قدر عليّا
الغالب 10 – 0 المغلوب
الهدف الاول : مفيش حاجه إسمها أب وأم وعيلة وإحترام , في فلوس اللي يجيبها يدوس علي أي حد .
الهدف الثاني : مفيش مشكلة إن الراجل يحضن البنت قدام أهلها طالما (إن بابلك ومفيش فيلنج)
الهدف الثالث : أهمية الإنسان بعدد الفولورز , عندك متابعين تبقى شاطر حتى لو كنت شيطان .
الهدف الرابع : سيبك من الكوارث اللي حواليك بلا إحتلال بلاحصار بلا تجويع ,كُل برجر أمريكاني وإشرب في صحة المعذبين في الارض .
الهدف الخامس : إوصفي نفسك إنك قوية وجميلة وخطيرة ومثيرة وعبقرية ولوزعية و(سوبر وومن) والناس هتصدق وتزحف وراكي .
الهدف السادس : خلي قدوتك النماذج (اللا شئ) اللي بيعملوا (اللا حاجه) ويقولوا (اللاكلام) عشان يوصلوا (للا فايده).
الهدف السابع : متركزش في الإكتشافات لامؤاخذه العلمية ولا البطولات الرياضية ولا إسمها إيه دي … الثقافة , فك كده متبقاش قفيل .
الهدف الثامن : تتكلم عربي تبقى (اولد سكول) عاوز تبقى هاي وشيك حط كلمه عربي مكسر وسط كلمتين إنجلش لانجوج فانكشن .
الهدف التاسع : تقمص دور الضحية تنجح .. إشتكي بحرقة من سهم النقد وخنجر الغدر ومطوة عشري , إحكي بوجع عن أعداء النجاح وعيط بعين واحده .
الهدف العاشر : استعرضي بمنتهى الغرور ممتلكاتك في مصر ودبي والرياض والمشاهدين يبيعوا بواقي زيت السمك ب 33 جنية .
الوقت بدل الضايع
لما منصة كبيرة تحب تعمل موضوع كبير لجمهور كبير ندور على نماذج ليها لزمة ونتعب عليهم .. الموهوبين في جميع الرأي اليومات مركونين على القهاوي بيشربوا إحباط بالمكسرات .
