خالد أبو بكر يكتب :الجحيم هو الآخرون من كتاب إحمي نفسك من الزومبي

الكشف الخامس : الزومبي يهول التافه ويهون المهم

الحاجه التافهة إللي بيعملها هو قد ايه خطيرة ومهمه ومؤثره وفارقة مع الحضارة وخطوة عظيمة في مسيرة البشرية.

الحاجة المهمة إللي عملتها أنت عادية وسهلة وبسيطة وأي حد يقدر يعملها وهو مرضيش يعملها من هيافتها وقلة قيمتها فساب إللي أقل منه ياكل عيش .

الحل : أعرف تمامًا إن إللي أنت عملته مهم لأنه فعلًا كده والأسوياء شايفينه كده وأنت نفسك حاسس بكده محاولات تحقيره لأعمالك متأثرش عليك بالعكس لما يهاجمك الزومبي ويحقر من أعمالك دا دليل إن الأعمال مهمة ولفتت انتباههم وخليتهم يحدفوا طوب.

الكشف السادس : الزومبي أصحاب مصانع الكلاكيع الكبري

رغم أنهم يقدوروا يحلوا المعقد إلا أنهم بيعقدوا المحلول هيصادف زومبي يخلصلك طلب أيًا كان ورغم بساطة الطلب لكن هيصورلك إنه معقد ومكلكع وهو هيبذل مجهود خرافي لحله والطلب مش هيمشي من غيره لأن الطلب أتشل رباعي وهو هيحطه على كرسي متحرك ويزقه لحد مايجيب الموافقة والتصريح والامضة والختم والتأشيرة وكل تأخيرة فيها شاي والسكر غلي وأنا أحلي بأيه .

الحل : اعكسله خططه صورله أن الطلب مش مهم بالنسبالك وإنك متردد تعمله ولا بلاش وإنك تقدر تستني سنة عادي مش لازم بكره الساعة تسعة يعني مش فارقه معاك وخلص حاجتك بالشكل الطبيعي وخليه يمارس زمبقتة علي ضحية غيرك.

الكشف السابع : الزومبي سفير النوايا السيئة 

هو ناويلك على داهية من الستين اللي عاوزك تروح فيهم بس فاشخ بقه بضحكة صفرا بتقولك حبيبي ولو لفيت وراه هتشوف السكاكين إللي مخبيها .

وعشان نواياه خبيثة دايمًا يشك في نواياك ورغم إنه هو محل (راديو شك) كبير إلا إنه يشك في كل حاجه وأي حد ومش بس كده دا كمان يفسرلك نواياك بطريقته فيقولك أكيد أنت بتعمل كذا عشان كذلك وضروري انت بتيجي هنا عشان هناك ولازم بتكلم فلانه عشان علانه وهكذا …… المهم يلهيك عن نواياه المهببه ويحطك دايما في موقف الدفاع عن تهم وهميه من إختلاقه .

الحل : متثقش فيه مهما حصل متلومش نفسك مهما قال متطمنش لأعماله حتي لو أطعم الجعان وكسا العريان وحقن فيتامين للهفتان كل دا قشرة تحتها بلاوي لها أنياب سامة مستنياك تغفل فتلدعك .

أما إللي شايف صورتك وحشة سيبهاله وروح أتصور صوره حلوه وبروزها وحطها جمب سريرك .

الكشف الثامن : الزومبي طبلة إزعاج جرس صخب نفير دوشة 

صوته عالي بدون مناسبة كل حاجه عنده بصوت منفر يقاطعك ويشتتك ويمنعك من التركيز في أي حاجه إلا هو .

وقت راحتك يرزع الباب يخبط قزاز الشباك يدبدب برجليه يجر العفش يسمع أغاني أنكر الأصوات حتى تكييف الزومبي بيزن ويحشرج وروحه بتطلع .

وقت نومك يدق ينشر يخرم يشغل شنيور صاروخ غسالة خلاط موتوسيكل يكلكس يزمر ينادي يرن يصرخ يجعر .

يشرب بصوت ياكل بصوت يتنحنح ويكحكح ويغرغر ويقرقر حتي النفس يشق صمت الهوا وكأنه يلفظ أنفاسه الأخيره مزعج لما يزعل مزعج أكتر لما يفرح.

الحل : أعرف مواعيد نشاطه الإزعاجي وأعمل دوشه تدوش دوشته عشان ميدوشناش .

ابعد عن أماكن نشاطه ولو مضطر تفضل حط سماعات وشغل إللي بتحبه ولو بيكلمك لخص وانهي الموضوع.

أقنع نفسك إن إزعاج الزومبي قدر زي الزلازل والبراكين والرعد والسيول وخليك مرن ومتسامح ومتقبل إن الهدوء المنشود لن يحدث إلا في الجنة ونعيمها ان شاء الله.

مشاهير زومبز :

الزومبي الأوحد : كائن فوق البشر تحت الرسل فيلسوف نقّاش مرضعة عالم ذرات محارب شر قاهر محن لافق المفتوق

(عندما يصاب الانسان بفتق في احد جوانبه فيصير مفتوقا يحتاج الى بطل اسطوري يلفق المفتوق )

له آذان عديده وفم واحد كبير وعميق لايغلق ابدًا به لسان طويل إن رفعه تخشي الطائرات الإصطدام به وإن خفضة تخاف الغواصات التعثر فيه

أنت من غيره .. مش قادر أقولك …………

مستني أقولك .. مانا مش قادر أقولك

الزومبي الفنان : بيسخر حياته ويقاتل بذاته ويضحي بمماته عشان يثبتلك ويأكدلك إن الرقاصة المومس أشرف من ست البيت المحتشمة وإن الخمرة والمخدرات من شروط الروشنة وإن السرسجي جدع ورجولة وصاحب صاحبه وإن البلطجة شهامة والنصب شطارة والنفاق لباقة والزنا مساكنة والشذوذ حرية والإلحاد تنوير .

الزومبي الاعلامي : يطبل علي طبلة ودنك .. ممكن تلاقي كلمة صدق فلتت منه من غير مايقصد .. مهمته يقنعك إن جواز عتريس من فؤادة حق وانك لازم تجيب كولا للي بياكل حقك وان اللي ينجسك أحسن من اللي يوضيك

الزومبي المثقف : هلامي سلامي لانشني متجزر متبحر متقعر متشجر متماهي متناهي وجودي عدمي مكر مفر حطه السيل من علي .. ياعلي.

  الزومبي الرياضي : يلاعب مؤامرة كونية أرضية الملعب والحكم المرتشي والأتحاد الظالم والمنافس الجبار والحظ الوحش .. مش موجود في القاموس الرياضي اللاعب المكسح ولاالمدرب الغبي ولا الجمهور السافل ولا اللياقة الضايعة ولا الدوافع المعدومة لكن ممكن اشباح بتلعب ضدنا او عمل مدفون في الجون .

أنتي فيروس مشاهير زومبز

شوف مين اللي بيتكلم ومصلحته ايه ورا اللي بيقوله تعرف ازى كان عدو ولا حبيب .

هات نفس المعلومة من أكتر من مصدر إللي معاها وإللي ضدها والمحايد وأطلع بنتيجة ورأي خاص بيك مش إتزرع في دماغك .

إللي كدب عليك مره هيكدب كل مره لو سحبت الثقة من حد مترجعش ولما تتلخبط استفتي قلبك إللي هو عقلك .

{نكمل الحلقة الجاية }