خالد أبو بكر يكتب :الجحيم هو الآخرون من كتاب إحمي نفسك من الزومبي 

في مسرحية لا مخرج لسارتر اتقابل تلاتة بعد وفاتهم ودخلوا في صراع جحيمي .. إذا كان جان بول سارتر يقصد أن الجحيم في الآخره هو وجود آخرين ينغصوا عليك أخرتك فهو مخطئ طبعًا لأن الناس في الآخره مش كده خالص لكن لو كان يقصد الناس في الدنيا فتمام جدًا هما كده بس معلش يا مسيو سارتر هنخليها الجحيم هو: الزومبيون.

احنا هنا مش بنتكلم عن الميتين ولا العايشين لكن عن العايشين ميتين ، هما بيتحركوا وياكلوا ويشربوا ويخلفوا لكن مش عايشين ماشـييـن جمبـك فـي الشـارع راكبيـن وراك في المواصلات ساكنيـن فوقك في العمـارة قاعديـن علي مكاتب واقفيـن علي نواصـي ماسكين ميكروفونات طالعين من شاشـات ناشـريـن بوستـات سارحيـن فـي محـلات ، ملاعب سينمات،  قهـاوي ، قاعـات ، عاملين عايشين وهما لاعايشيـن ولا ميتيـن هما لمؤاخذة.. زومبي

هتلاقيهم وسط مدرسينك ومديرينك نايمين جوه دولاب،  طالعين من درج ماسكين ختم .. هتتفرج عليهم بيلعبوا كورة بيمثلوا يغنوا يرقصوا يطبلوا يهجصوا يطلعولك من البرامج يهاجموك ويضللوك ويعلموك ازاي تعيش وهما .. زومبي

جهاز كشف الزومبي

عوّد قرون استشعارك علي كشف الزومبي في أي وقت وبسرعة قبل مايسيطر عليك

الكشف الأول : الزومبي هيدخل معاك في صراع

الحل : سيبه يصارع مع نفسه امشي أنت وخليه في قلب الصراع قوله أنت جامد أنت عظيم أنت كسبت مبروك روح يازومبي احتفل بإنتصارك  وسيبني أكمل حياتي في هدوء

الكشف التاني : الزومبي هيحطك في مقارنة

هو أحسن منك في كل حاجه هو الأذكى والأعرف والأعلم هو الأكتر تدين وأخلاق وأدب هو الأكتر شطارة ومهارة وقدرة هو الأنشط والأسرع والأعلى هو الأقيم والأبرز والأهم هو الأوسم والأشيك والأكتر جاذبية

الحل : قوله مبروك أنت كسبت جايزة أحسن زومبي علي وجه الأرض وتحت الأرض وسيبه غرقان في أوسمته ونياشينه وتيجانه وصولجانه وكمل أنت حياتك العادية المملة لأنك انسان عاري من الصحة

الكشف الثالث : الزومبي هيستغلك ويستخدمك

نرجسية الزومبي بتصورله إنه اتولد عشان يكون سيد مطاع وأنت بالنسبه له عبد ذليل بس مش هيقولك كده في وشك هيعمل معاك كده فعلًا هتلاقيه بيأمر وينهي ويوديك ويجيبك ويشيلك ويحططك وينام ويسيبك صاحي ويكلفك بالأعمال القذرة ويحتفظ لنفسه بمهام التخطيط والإشراف والمتابعة

الحل : حط أنت خطط بديلة وإشرف علي نفسك وتابع التنفيذ ولما تنجح هيقولك شوفت مش قولتك أنا كنت عارف زي ماخططت بالظبط مع إنك عملت عكس إللي كان عاوزه أبتسم ومتعلقش لأن محاولة تحويل الزومبي النرجسي لانسان حي يرزق أصعب من محاولة تحويل الدبانة لفيل أزرق يطير

الكشف الرابع : الزومبي معصوم من الخطأ

اعتراف الزومبي بالخطأ ضرب من الجنون هو مبيغلطش أبدًا سامع .. أبدًا.. هو معتنق حكمة : أنا رأيي صواب لا يحتمل الخطأ ورأي غيري خطأ لا يحتمل الصواب

الزومبي بيفهم في كل حاجه وجايب آخر أي حاجه وعارف إللي حصل وإللي بيحصل وإللي هيحصل داخل في تلافيف عقول الناس وشاقق صدورهم ولابد في خلاياهم توقعه حدث وتخمينه تأكيد ونظرته تصيب الهدف في المنتصف فتقتله

الحل : لا تناقش ولاتجادل يا اخ …. وفر وقتك ومجهودك وتفكيرك لحاجه مفيدة واوعى تستهلك نفسك في جدالات دائرية تنتهي من حيث بدأت واياك تواجه الزومبي بخطأه هو مش بس هينكره إنكار تام لكن بعد رغي وهبد وسفسطة هيطلعك أنت الغلطان .. سيبه سايق في غلطه لحد مايلبس في الحيط ..

{نكمل الحلقة الجاية }