خالد أبو بكر يكتب : إثبت .. متخليش ولا واحد يشمت

عنوان المقال من أغنية تتر مسلسل هو وهي للعبقري متعدد المهارات صلاح جاهين .. وعشان تثبت ومحدش يشمت يلا نعمل كده

خفف من نقد الذات

تقييمك المنخفض لذاتك أكيد هيفقدك ثقتك بنفسك .. طبيعي إنك تنتقد ذاتك من وقت للتاني في تصرف معين مش عاجبك أو قرار خدته وطلع غلط لكن الإفراط في نقد الذات – خصوصًا أمام الآخرين – يهز صورتك ويكبل قدراتك ويضعف أدائك في دراستك وعملك وعلاقاتك .

محاسبة الذات ضرورة حتى لا ندمن العادات السيئة ونهمل العادات الجيدة لكن الإفراط في المحاسبة واللوم والنقد يحول الموضوع إللي جلد الذات .. يعني تربط ذاتك في عمود وترزعها تمانين جلده .. دا مينفعش .. الجروح إللي هتتسبب فيها هتفضل تألمك فترة مش قصيرة وخصوصا لما تقرر تجلدها تاني وهى لسه ماخفتش

انت: يا نفسي إنتي ارتكبتي جريمة أكل نص صينية باشاميل في تالت يوم فري الإسبوع دا وكمان تاكلي وتنامي .. ومتهمة إنك شربتي ميه غازيةمع إننا قولنا هنشرب ميه بس ونقطع علاقتنا بالغازية قليلة الأدب.. متهمة إنك كسلتي في تمارين البطن وبعد ما كنا بنعمل خمسين عدة بقينا بنخبط علي بطننا خبطتين نسمع صوت الطبلة .. وتنامي ..متهمة إنك ضحكتي لسمر واحنا متخاصمين .. وبوذتي في وش نادر واحنا متصالحين .. متهمة إنك بتأجلي المذاكرة والشغل ولما تتعبي من اللعب .. بتنامي .. متهمة إنك بتعملي الـــ …… بعد ماتوبنا وحلفنا مانعمل كده تاني .. بعد تلاوة الإتهامات صدر الحكم عليكي بــــ……يا نفسي .. نفسي .. إنتي نمتي ؟!!

متقارنش نفسك بحد

كل إنسان عنده مميزاته وعيوبه وعنده أوقات نجاح وأوقات فشل وعنده إمكانيات في مجال معين ومحتاج للآخرين في مجالات تانية يعني بإختصار إنت مش شبه حد يبقى متحطش نفسك في مقارنة مع أي حد .

• انت بتشوف جزء من حياة الناس .. هتقارن نفسك بحد أغنى منك او أقوي منك او أذكي منك او أجمل او أشهر او او او …. انت شايف صفه معينه ومش شايف النواقص اللي في شخصيته.. أكيد عندك صفه مش موجوده عنده وهو محتاجها .. المشكلة تكون انت نفسك مش شايفها .. لأنك شاغل نفسك بالآخرين وكل ماتتحط في مقارنه تطلع خسران .

لما والدتك تقارن مستواك الدراسي بإبن خالتك وأبوك يقارن عقوقك بطاعة إبن الجيران ومراتك تقارن دخلك بدخل جوز أختها ..لو المقارنات دي بتزعل قوي ليه إنت نازل مقارنة في نفسك لما صغرتها وخليتها متسواش. مش عيب تشوف الآخرين مميزين في ايه وتغير منهم (غيرة إيجابية) وتتمنى إنك تبقي مميز وناجح .. طبعاً من غير ماتتمنى فشلهم او زوال نعمتهم.. حكمة مكتوبة على ضهر توكتوك (غير ولا تحسد) .

• شوف انت مميز في إيه وكبره وشوف عيوبك إيه وصلّحها .. من غير مقارنات .

إوعي تشكك في إمكانياتك

مش هقدر .. صعب .. مستحيل .. مش ممكن .. كلمات بتكسّر معنوياتك وتبني جدار إحباط بينك وبين النجاح .

الملاكم لو قال لنفسه قبل المباراه بثواني .. الخصم أقوي مني .. أنا مش هقدر اهزمه .. هو هزم ناس اقوي مني .. النهارده مش يومي ……

دا مش بس هيتهزم .. دا هياكل علقة مكلهاش متحرش في زنقة الستات .. التشكيك في إمكانياتك قبل المعركة أول أسباب الهزيمة .. شعورك إنك مش قد المنافسة وهزيمتك مسألة وقت هيخليك كده فعلا .

الشك يضعف معنوياتك ويخليك متردد وجبان .. الشك يجذب الهزيمة والخساره والتراجع .

• ثق في نفسك .. فكر بإيجابية .. واجه بقوة..إثباااااات.

(نكمّل الحلقة الجاية)