حوريه فرغلي تفتح قلبها وتكشف أسرار وخبايا مرت بحياتها في برنامج العمق مع تامر شلتوت

إسراء البواردي

كشفت الفنانة حورية فرغلي أصعب المواقف التي مرت بها، خلال حياتها.

إذ أشارت إلى أنها كانت في إحدى الليالي تتناول العشاء مع والدتها وخالتها، وفوجئت بأن خالتها فاضت روحها إلى بارئها وهم على منضدة الغداء، وهو الأمر الذي تسبب لها في أزمة كبيرة ،خاصة بعد أن طلبت منها والدتها أن تشارك في غسل خالتها.

وتحدثت حورية فرغلي عن كواليس هذا اليوم، خلال لقاؤها مع الإعلامي تامر شلتوت، في برنامج في العمق، موضحةً: خالتي كانت معايا أنا وأمي وقعدين بنتعشى، فجأة وطت رأسها أفتكرتها نامت، بنصحيها مبتصحاش، جبنالها الدكتور قال ماتت، وربطوا رأسها لفوق، لتاني يوم عشان كان يوم شم النسيم، والناس أجازة

وتابعت حورية فرغلي: تاني يوم المُغسلة جت الصبح، قالت لماما محتاجين حد من عندكم يكون معانا عشان الصيغة إللي لبساها، ماما قالت لي قومي غسلي خالتك عيب، بصيت لبنتها وقلت طب قومي أنتِ، أنا عمري ما شُفت حد ميت قبل كدة.

وأضافت حورية فرغلي: مشيت ورا المُغسلة، ومكنتش عارفة أنا خايفة ولا مرعوبة، شيلنا المخدة لقينا رأسها أتخشبت لأن بقالها كتير متوفية، وبعد ما خرجت قعدت جمب جوز ماما، قالي برافوا يا ريريت، كدة أتغفر لك 50 كبيرة من الكبائر، قُلت له مش كنت أعملهم الأول، وزعلت من ماما جدًا بسبب الموقف ده.

وأستكملت حورية فرغلي: بربي كلاب في بيتنا، وكانوا بيدخولوا معايا كل مكان في الشقة، لكن بعد وفاة خالتو عمرهم ما دخلوا الأوضة إللي خالتي توفت فيها، مدخلوهاش لمدة سنة، ودي كانت من أغرب الأشياء إللي لاحظتها من الكلاب، عمري ما خفت من الموت لكن بفكر في شكلي هبقا عاملة إزاي لما أموت، وأكون مكان خالتو.

وروت الفنانة حورية فرغلي، تفاصيل رؤية مرعبة رأتها بمنامها، حيث أشارت إلى أنها حلمت بهذه الرؤية وهي في العاشرة من عمرها، لكن رغم مرور السنوات، لكنها لم تستطع أن تنسى هذه الرؤية، حيث رأت نفسها مكفنة، ولم يظهر منها سوى يدها، وتنتظر الساعة تصل لـ 12، حتى تسأل عن ما فعلته في حياتها.

فقالت حورية فرغلي: حلمت وأنا صغيرة أن في صندوق خشب عامل زي الأوضة، بس منورة رغم أن مفيهاش لمبة، وأنا في كفن وإيدي بس إللي طالعة، ومنتظرة الساعة تيجي 12، عشان يجوا يخدوني أتسأل.

وتابعت حورية فرغلي: في اللحظة دي أنا كل دقيقة بتعدي عشت فيها رعب، لغاية ما قُمت من على السرير مفزوعة، رغم أني مشوفتش وشي في الحلم، لكن بسبب الرؤية مازال عندي مشكلة كبيرة في النوم، بنام بصعوبة وعشان أحلم محتاجة معجزة.

وعلقت الفنانة حورية فرغلي على أزمتها مع حسن شاكوش، بعد أن قالت طليقة الأخير أن شاكوش على علاقة بفتاة ثالث حرف من اسمها راء، وربط الجمهور بين حورية وعلاقتها بشاكوش، وهو ما نفته الفنانة وأكدت أنها ليس لها علاقة بشاكوش، ولم تقابله ولا مرة من قبل.

وردت حورية فرغلي عن ربط الجمهور، بين اسمها واسم حسن شاكوش بعد تصريحات ريم طارق، إذ قالت: في مليون اسم اشمعنا حورية مسكتوا فيه، وأنا عمري ما شوفت شاكوش، بس بحب اغانيه، وزعلانة أنه طلق ريم، لو مكنش في حب جامد بينهم مكنش هيكون في خناقاتهم، هي بتحبه اوي وغيرتها عليه، بس هو مش عايز يبان قدام الناس أنه بتاع ستات.

وتابعت حورية فرغلي: ريم المفروض كانت تتعلم إزاي تخلي حسن ميبصش لحد غيرها، إللي اسمها سارة دي أنتو سافرتوا مع بعض وخرجتوا مع بعض، فمحبتش اسمي يجي حاجة زي، أنا زعلت أن الموضوع خصوصًا أنه داخل في حتة الشرف، فلما تقولي اسمي هخرب لكم الدنيا.