تعرف على مستجدات أزمة رحمة حسن مع المنتج هاني سلامة
أسماء حسني
نشرت الفنانة رحمة حسن عبر صفحتها الشخصية علي موقع تبادل الصور والفيديوهات إنستجرام منشوراً تخاطب فيه الدكتور أشرف زكي بخصوص أجرها عن مسلسل سابع جار والمنتج هاني سلامة الذي لم تأخذ منه أجرها بالكامل وقالت (اولا : كل الاحترام والتقدير للدكتور أشرف زكي على استجابته وسؤاله .. واحب اوضح ان الفلوس اللي ليا عند هاني اسامة المنتج هي باقي اجري عن مسلسل سابع جار .. وكان ليا جزء كبير منها .. ولجأت للدكتور أشرف زكي في 2019 علشان يساعدني .. وحصل .. واداني جزء بسيط من فلوسي).
وتابعت موضحة (وللعلم الوقت ده كان بابا تعبان وفي المستشفي وهاني أسامه كان عارفه وقلتله اني محتاجه الفلوس ارجوك .. ورفض بعدها يديني اي فلوس من باقي اجري ومكانش بيرد علي أي رسايل او مكالمات مني .. للاسف بابا اتوفي بعدها بكام يوم .. ومن ساعتها وانا تعبانه ومش ناسيه هو عمل معايا ايه .. وكان صعب عليا اني اطلب تاني من دكتور اشرف زكي انه يتدخل لان هاني مش بيستجيب اصلا .. وانا كنت تعبانه من كتر مابطلب حقي وهاني بيتهرب).
وأستكملت رحمة (بس بين كل فترة والتانية كنت يبعتله رسالة او اكلمه وبرضوا مافيش حاجه ،، كل ده بمنتهي الذوق والاحترام والرسايل موجود معايا من 2018 كله علي التليفون .. وطبعا الوقت بيعدي وانا معنديش شغل معانديش دخل .. تعبت وبعتله من كام يوم تاني وقلتله .. وبرضوا مافيش حاجه .. وكمان العقد بتاعي معايا ومخصوم منه الضرايب الي دائما بدفعها علي أي عمل بشارك فيه من زمان).
وأكدت قائله (العقد بتاعي علي مسلسل 60 حلقة .. هاني صور وذاع ع 67 حلقة يعني ليا كمان 7 حلقات مش موجودين في عقدي وماختش عليهم كمان اجر وماطلبتش بيهم اصلا بس هو عارف .. الفكرة انه طلع ان فيه كذا شخص في الشغل مش انا بس عندهم نفس الموقف مع هاني .. ويمكن فلوس اكتر بكتير وفي نفس الموضوع والنقابات والقضية وما الي ذلك).
وقالت أيضاً (اما بخصوص أن الدكتور أشرف طلب مني أني أروحله النقابة عشان نتكلم في الموضوع .. أنا قلتله أني مش عايزة اتعبه أكتر من كدا معايا .. خصوصاً أني عارفه أني مش نقابية وإني بشتغل بتصاريح ومش عايزه أضيع وقته خصوصاً أنه ساعدني قبل كدا .. وكمان عشان عارفه أن هاني مش بيستجيب عشان هو منتج فا تبع نقابة تانية .. وكنت عارفه أن الدكتور أشرف كلمه قبل كدا في موضوع الفلوس ده وبرضوا محصلش حاجه).
وأختتمت كلامها (يعني لو كان عايز يدفع كان دفع من زمان .. المسلسل اتذاع وخلص وهاني عمل بعده كذا عمل .. انا قلت للدكتور اشرف اني مش هقدر اجي لاني تعبانه واني مش هاشيل البوست لحد ماخد فلوسي .. لاني بحاول اجيب حقي الي بقالي 3 سنين مش عارفه اجيبه، شكراً لكل حد أهتم .. بس أنا حبيت أوضح ايه الي بيحصل .. وشكراً لكل الي ساعد والي بيحاول يساعد .. وللعلم انا لسه ماخدتش فلوسي برضوا .. شكراً).
يذكر أن آخر أعمال الفنانة رحمة حسن كان في 2018 وهو فيلم نص جوازة بطولة كلاً من الفنانين مريم حسن، رحمة حسن، مصطفى أبو سريع، ليلى عز العرب، سلوى عثمان، وعبد الرحمين حسن، وسيناريو وحوار منه عبيد وأحمد مجدي وإخراج سيف الساحر وإنتاج أيمن عبد الباسط وأحمد عبد الباسط.
وشاركت أيضاً في فيلم الرجل الأخضر مع عدد من النجوم مثل سامح حسين، إدوارد، هالة فاخر، سليمان عيد، ومارتينا وإخراج مرقس عادل وتأليف جوزيف فوزي.
