بعد اتهامه لزوجها باختطافها.. حلا شيحة ترد على والدها: الكلام ده لا يصح أبدًا

ريم عبد العزيز

أعربت الفنانة حلا شيحة عن استيائها وانزعاجها الشديد من حديث والدها الذي اتهم فيه زوجها الداعية معز مسعود باختطافها.

وقالت الفنانة حلا شيحة ردًا على اتهام والدها عبر حسابها الخاص على موقع الصور والفيديوهات الشهير انستجرام: “الحقيقة مصدومة من الكلام اللي والدي قاله عن زوجي اللي اتجوزته بكامل إرادتي، والحمد لله لقيت معاه كل المعاني الجميلة من احترام ورجولة والكلام ده لا يصح ابداً”.

وردت على اتهام والدها لخطف زوجها لها قالت: “أنا لم يخطفني أحد كما قال والدي والكلام دا لا يصح أبداً، أنا بحب زوجي وسعيده بحبه ليا وبنحترم بعض ومعز بيحترم رأيي وبيقدر مشاعري وبالعكس هو دائماً بيهديني.. وطبعاً بيساندني ويشجعني لأني زوجته وحبيبته.. وهو أكبر بكتير من كل الكلام اللي بيتقال عليه والإفتراءات مش صحيحة وهو أبعد مايكون عنها”.

وأشارت حلا شيحة إلى أنها لن تسمح لأي شخص بالتحدث عن زوجها بالسوء، ونفت إنتمائه لأي جماعة أو فئه معينة موضحة: “معز  طول عمره له رؤيته الواضحة في الدين وحتى في الفن، وهو ليس مع أي جماعة أو فئة معينة هو يمثل نفسه وله أفكاره وارائه العلمية والدينية المختلفة الجميلة”.

وتابعت: “هو خلاص اي حد يتكلم بلغة الدين لازم يبقى متطرف أو اخواني هو مبقاش في مسلمين وسطيين طبيعيين هو ليه كل أنواع الهجوم ده على أي حد”، وعبرت عن حزنها الشديد من والدها بسبب الكلام الذي قاله عنه قائله: “أنا زعلانة من والدي جداً لأنه يعرف معز كويس جداً وقعدوا مع بعض كتير ووالدي يحبه جداً وشاف منه كل خير”.

وأوضحت حلا شيحة أن زوجها تزوج وعمره 14 عام وكان يعيش حياة مستقرة وأنجب طفلان ولكن لم يكمل زواجه وحدث الطلاق، حيث قالت: “عمره ماكان بتاع ستات زي مابيتقال كلام لا يليق أبداً وفي الآخر زيي لم يكمل جوازه وحدث الطلاق وكلنا معرضين لده طبيعي انه كان يحاول زي أي راجل محترم انه يلاقي استقرار في حياته في الحلال ومتوفقش أكتر من مرة ودي مش حاجة تعيب أي حد”.

واستكملت: “بدل ما ندعي لبعض بالخير بقينا نتصيد لبعض ونخوض في أعراض بعض هو حصل في مجتمعنا ده احنا جرالنا ايه”، وقامت بتوجيه رسالة لوالدها وقالت: “مع كامل إحترامي لك وللجميع، أنا الحمد لله سعيدة في حياتي ومع زوج اتشرف انه زوجي وبعتز بيه واحنا اصدقاء قبل أن نكون أزواج، وكل كلمة أكتبها وقلتها نابعة مني وأنا متدينة بطبعي زي أي ست مصرية بتحب دينها وده لا يعيبني .. وتديني اللي بدأ من أكتر من 15 سنة من المنطقي ان معز مش هو سببه”.

واختتمت كلامها: “مش محتاجة حد يخطفني او يكتب عني او يوجهني.. هذا كلام لا يليق.. دعوا الخلق للخالق وكل واحد يخليه في حاله.. ياريت نسمع من بعض بدل من نسمع عن بعض.. أحسنوا الظن”.