السيسي:« لا مساس بمياه مصر ورد فعلنا سيهدد استقرار المنطقة»
قال الرئيس عبد الفتاح السيسي، إنه لا مساس بمياه مصر ولن نسمح بالمساس بها، وسيكون رد فعلنا قوي حال المساس بالمياه.
أضاف الرئيس،« لا نتحدث كثيرا، ولن يستطيع أحد أخذ نقطة مياه من مصر، لا نهدد أحد وحوارنا رشيد جدا وصبور جدا، ولا احد يتصور أنه سيكون بعيدا عن قدرتنا، ورد فعلنا علي المساس بمياه مصر سيهدد استقرار المنطقة بالكامل»
وأوضح الرئيس خلال مؤتمر صحفي على ضفاف قناة السويس،« أنا ليا توصية عندكم.. من يومين تلاتة كنا بنتكلم عن الدلتا الجديدة، وأنا شوفت الإعلام بيتناولها إزاي في الجورنال بشكل مش مفصل».
استكمل:« لو عاوزين بيانات البيانات موجودة على الموقع الرئاسي بتفاصيل كل المشروعات ولو تواصلتو مع الجهات المعنية هتديكو كل البيانات، لكن بنتكلم في مليون ونصف فدان، وخلال سنتين ونصف هنكون زراعينهم على طريق الضبعة شمالا وجنوبا ».
تابع:« الميه دي اللي هنستخدمها هي المياه المعالجة الثلاثة المطورة حتى تصلح للإستخدام في الزراعة، وهو ماتم في 3 مناطق بمصر أولها المحسمة بمليون متر يزرع 50 ألف فدان شرق القناة، والمية دي كانت بتترمي في بحيرة التمساح وتعمل تلوث».
وقال،« وخلال شهر 6 المقبل هيكون محطة بحر البقر وهي محطة 5.6 مليون متر في اليوم ودي كانت مية صرف بتترمي في المنزلة هنآخدها شرق القناة بمحطات معالجة وهيزرعوا حوالي 500 ألف فدان».
أوضح:« الإعلام لازم يرصد ده ويتكلم فيه علشان تعززوا بلدكوا وتقولو البلد بفضل الله بتتحرك للأمام وبقوة وإصرار وقدرة وفهم وتخطيط وتنفيذ كبير أوي».
