استغاثة عاجلة من مقدمي الإعلان العاشر بالإسكان الاجتماعي في مدينة العاشر من رمضان
كتب: محمد نبيل
سادت حالة من الغضب بين المواطنين المنطبق عليهم الشروط بالإعلان العاشر بشقق الإسكان الاجتماعي في مدينة العاشر من رمضان بمحافظة الشرقية، بسبب ترتفاع قيمة المقدم والأقساط عند الاستلام.
من جانبه قال كريم عبد الوهاب أحد المستفيدين: “أنا تابع للبنك الأهلي ودفعت مقدم الحجز ١٤٣٠٠، ثم تم سداد ١٠ أقساط كل قسط بمبلغ ٢٠٥٠ جنيه بإجمالي ٢٠٥٠٠جنيه، وعند التعاقد دفعت ٣٥٠٠٠، والدعم ٢٢٠٠٠ والقسط ١١٠٠ متزايد ٧% لمدة عشرين عامًا، وكده كتير جدا وحرام، أنا كل مرتبي ٢٧٠٠ هدفع قسط ومياه وكهرباء، يبقي مش هعرف أعيش أنا وأسرتي”.
وتساءل محمد حسن قائلًا: “إزاي الشقة تمنها ٢٢٥ ألف، ولو خصمنا الدعم والمقدم ٦٨ ألف، يبقي الشقة بمبلغ ١٦٠ ألف، بمعني إن البنك هيدفع ١٦٠ ألف هياخدهم ٤٥٥ ألف يعني البنك واخد ٢٩٥ ألف، هل ده يرضي ربنا ولا يرضي أي مسئول؟”.
ويقول زكريا كرم: “البنك الأهلي كلمني وطلب مني مقدم 32500 وقسط 880 بزيادة سنوية 7٪ لمدة عشرين سنة، أنا شايف إنه كتير جداً في ظل الظروف اللي بنعشها كلنا يبقي أنا هفضل أدفع أقساط حتى لقاء ربي”.
ويقول أحمد الشيخ: أنا تابع لبنك قطر الوطني QnB و الموظف قالي لو عايز أقل مقدم هيبقي ١٥٠٠٠جنيه، والقسط١٤٥٠جنيه متصاعد لمدى ٥سنوات ياعني هيزيد كل سنة لحد ما يوصل ٢٠٠٠ جنيه، وهيثبت على كده لآخر المدة، كده تقريبا مسئولي الإسكان والتمويل العقاري بينتقموا مننا”.
ويقول خالد محي: “أنا الإعلان العاشر البنك قطر كلمني وطلب مقدم 66٠٠٠ جنيه، وقسط شهري 870 لمده 3 سنين، وبعد كده هيزيد وهيثبت علي 1050 أنا لو معايا ٦٦٠٠٠جنيه مش هفكر أقدم على شقة، و المشكلة اللي معايا فعلا إزاي هجيب المقدم الكبير ده، وحاولت أقلل في المقدم والقسط الشهري يزيد، الموظف رفض ورفض يحولني على بنك آخر”.
ويقول مصطفي حامد: “من المفترض أن كراسة الشروط تطبق عند استلام الشقة وكتابة العقد، لكن اللي بيحصل العكس وأنا اشتريت الكراسة لأن الأرقام المعلنة اللي فيها مناسبة لظروفي، أولا السعر زايد ١٠ ٪، بالإضافة إلى الصيانة ٥٪ يبقى السعر٠٠٠ ٢٢٥ + ٣٣َ٧٥٠ يبقى الإجمالي ٢٥٧٧٥٠، بالإضافة إلى الدعم”.
وتساءل محمود حمدي: “هل ده قانوني هل القانون هيحميني ويديني شقة ولادي اللي أنا طالع عيني في أقساطها لمدة ٣سنين كده الشقة واقفة ع البنك ١٦٠ ألف وكده سعرها كاش لو هتشتريها من البنك ٢٢٥ الف ولو قسط يبقى ٤٤٠الف كل ده مكتوب فى ورق الشقة عندى أين المسؤلين من كل ده .
وناشد عدد كبير من المواطنين المنطبق عنهم الشروط الرئيس عبد الفتاح السيسي والدكتور مصطفي مدبولي بالنظر لهم بعين الرحمة والتدخل لإيجاد حلول عاجلة لهذا الأمر، نظرا لما يمرون به من ظروف اقتصادية واجتماعية كبيرة.
